साउने रङमा सेलिब्रेटी: व्रत बसेर राम्रो श्रीमान् पाइँदैन

साउनलाई रंगीन महिना मानिन्छ । साउनको आगमनसँगै वर्षभरिका महत्वपूर्ण चाडवर्षहरू सुरु हुन्छ । सांस्कृतिक, धार्मिक एवं सांगीतिक दृष्टिले पनि साउनको महिमा उच्च छ । मेहन्दी, चुरा, साडी, गरगहनाप्रेमीका लागि त साउन उत्सवको महिना नै मानिन्छ । साउन महिनाको महिमालाई कलाकारले कसरी लिएका छन् त ? केही प्रतिनिधि सेलिब्रेटीको विचार र अनुभव यहाँ प्रस्तुत गरिएको छ:
भगवानसँग केही मागेको छैन
केकी अधिकारी, अभिनेत्री

साउने सोमबारको व्रत बसिराछु । यो महिनाभर शाकाहारी भोजन गर्छु । भगवान्सँग केही माग्नु हुँदैन, भगवान्ले आफैं बुझ्नुहुन्छ रे । त्यसैले केही मागेको छैन । वर्षभरि मासु खाइन्छ, एक महिना भए पनि ‘भेज’ खाना खाँदा ‘गुड फिल’ हुन्छ । ‘फिटनेस’ को लागि पनि राम्रो हुन्छ । साउन महिनाको वातावरण नै राम्रो लाग्छ । सबैतिर हरियाली हुँदा धेरैलाई खुसी देख्छु । महिलामा सुन्दर हुने रहरहरू जागेको देख्छु । यो महिना रहर पूरा गर्ने, खुसी हुने बहाना हो । मलाई पनि मेहन्दी चुरा लगाउन रहर लाग्छ । कलाकार भएदेखि सधैं चलचित्रको छायांकनले गर्दा मेहन्दी लगाउन पाएकी छैन । हरियो चुरा चाहिँ लगाएकी छु ।

व्रत बसेरमात्र राम्रो श्रीमान् पाइँदैन
आस्था राउत, गायिका

अहिलेसम्म व्रत बसेको छैन । व्रत बसेर राम्रो श्रीमान् पाइन्छ भन्ने कुरामा विश्वास लाग्दैन तर अरूको आस्थाको सम्मान गर्छु । बच्चैदेखि ‘टम बोय’ जस्तो थिएँ । सानो छँदा कहिलेकाहीँ मेहन्दी लगाउँथे । बुझ्ने भएपछि हातमा मेहन्दी, चुरा लगाएको छैन । हरियो रङ मन पर्छ । दिदीबहिनीलाई हरियो रङमा देखिनुहुन्छ, रमाइलो लाग्छ । यसपालि दिदीबहिनी जम्मा भएको ठाउँमा मलाई पनि सबैले मेहन्दी लगाउन कर गरे । पाखुरामा मेहन्दीको टाटु बनाएँ । आ आफ्नो आस्था बोकेका महिलालाई धेरै खुसी देख्छु । अरूलाई खुसी देखेर म पनि खुसी हुन्छु । पानी पर्ने भएकाले धूलो कम उड्छ । साउन महिनाको यही विशेषता मन पर्छ । हरियाली मन पर्छ । तर व्यस्तताको कारण त्यस्तो वातावरणमा जाने अवसर मिल्दैन ।

भगवानलाई हेरेर मुसुक्क हाँसे
कोमल वली, गायिका

साउनको पहिलो सोमबार पशुपतिनाथमा तीजको गीत रिलिज गरेँ । व्रत बसेर भगवान्सँग गीत सुपरहिट होस् भन्ने वरदान मागेँ । मेरो गीत हिट त भइहाल्छ तै पनि देवादीदेव महादेवको कृपा रहोस् भनेर भगवान्लाई हेरेर मुसुक्क हाँसे । मेरो गीत हेरेर भगवान् पनि हाँस्नुस् है भनेँ । भगवान्लाई खुसी बनाएँ । व्रत बसेको दिन सधैं पानी टन्न पिउँछु, पूजा गरेर फलफूल खान्छु । त्यसको एक दुई घन्टापछि दूध खान्छु । बाहिर निस्कनुपर्ने जरुरी काम छैन भने दिनभर घरमै बस्छु । दिउँसो पनि फलफूल खान्छु । साँझ पूजा गरेर रोटी खान्छु । मलाई साउन महिना साह्रै मनपर्छ । पानी परेको एकदम मन पर्छ तर छाता कहिल्यै बोक्दिनँ । पानीमा रुझ्न मनपर्छ । व्यस्त भएर हरियो चुरा चाहिँ लगाउन पाएकी छैन ।

शिवजीले वर दिएनन्
दीपाश्री निरौला, अभिनेत्री

अहिलेसम्म व्रत बस्दा शिवजीले मलाई वर नै दिएनन् । त्यसैले यसपालि चलचित्र छक्का पन्जाको लागि व्रत बस्दैछु । बिहान फलफूल र चिया खान्छु । बेलुकी च्याँख्ला खान्छु । साउन एकदम रंगीन महिना जस्तो लाग्छ । यही महिनादेखि रंगीन चाडहरू सुरु हुन्छ । आफू पनि रंगीन बन्न मन लाग्छ । हातमा मेहन्दी, हरियो चुरा लगाउँछु । सधैं खुसी हुने प्रयास गर्छु । खुसी हुने यस्ता बहानाहरू छोड्न मन लाग्दैन । पानी पर्ने भएकाले पनि यो महिना मनपर्छ । पानी परेको बेला लङ्ग ड्राइभ जान मनपर्छ । पानीमा भिज्न उत्तिकै मन पर्छ ।

व्रत बस्न छोडेँ
विनीता बराल, अभिनेत्री

धेरै पहिले एक पटक साउने सोमबारको व्रत बसेकी थिएँ । गाह्रो भएर त्यसपछि व्रत बस्न छोडेँ । पेट खाली भएपछि खसीको मासु र भातमात्र याद आउँछ । व्रत नबसे पनि साउन महिना मनपर्छ । झरी परेको, सबैतिर हरियाली देख्दा मन नै रमाइलो हुन्छ । यसपटक हरियो चुरा लगाएकी छु, मेहन्दी चाहिँ लगाउन भ्याइनँ । यसपालि मेरो पहिलो उपन्यास जुइनोको प्रोमोसनमा हिँडिरहेकी छु । अलि व्यस्त छु । कतै मनपर्ने मान्छेसँग भेट भइहाल्छ कि भनेर यो रमाइलो महिनामा राम्री बनेर हिँड्न मन लाग्छ । अहिले म जुइनोको अशोकसँग प्रेममा परेकी छु । कतै अशोक भेटिएला कि भनेर पनि चिटिक्क परेर हिँड्छु ।

आफ्नै लागि ब्रत बस्छु
रीतु कँडेल, गायिका
साउन महिनाको सोमबार व्रत बस्छु । धेरैले राम्रो श्रीमान् पाऊँ भनेर व्रत बस्छन् तर म चाहिँ आफैंलाई राम्रो होस् भनेर व्रत बस्छु । स्वास्थको ख्याल गर्दै खाली पेट व्रत बस्दिनँ । फलफूल, दूध, पानी खान्छु । यो भगवान् शिवको आराधना गर्ने महिना भएकाले धेरै महिमा हुन्छ र मलाई मन पनि पर्छ । साउन महिनाभरि माछामासु खादिनँ । रंगीन महिना भएकाले रातो, पहेँलो, हरियो लुगा लगाउन मनपर्छ । हातमा मेहन्दी, चुरा लगाएकी छु । यो हाम्रो मौलिक संस्कृति हो । संस्कृति जोगाउँदै चुरा मेहन्दीको व्यापार बढाउन हामीले सहयोग गरेका हुन्छौं ।

साउनमा एकसाइटेड हुन्न
सोम्या बराइली, गायिका

साउन महिनामा एउटा दिनमात्र सेलिब्रेट गर्छु । साउन २२ गते मेरो जन्मदिन भएकाले यो दिन मात्र मेरो लागि विशेष लाग्छ । हुन त जन्मिएको महिना भएकाले साउन यसै पनि मन पर्छ । साउन महिनाको लागि एक्साइटेड हुन्न । तर व्रत बस्ने, मेहन्दी, चुरा लगाउने कुरामा कुनै रुचि छैन । यसरी मनाएको पनि छैन । तर अरु ब्रत बसेको, मेहन्दी, चुरा लगाएर झिलिमिली भएको देख्दा चाहिँ रमाइलो लाग्छ । तीजको आयो भनेर रमाइलो पनि लाग्दैन ।

झरी एकदम मनपर्छ
प्रविशा अधिकारी, गायिका
यसपालि व्रत बसेको बसिनँ । साउन महिना चाहिँ धेरै मनपर्छ । यो महिना सुरु हुनासाथ मेहन्दी, हरियो चुरा, रातो, हरियो पहेँलो लुगा लगाउनाले रंगीन लाग्छ । यस पटक चुरा लगाएको छैन । मेहन्दी चाहिँ लगाएँ । भगवान् शिवको आराधना सँगै तीज आएको संकेत यो महिनाले गर्छ । नेपाली हिन्दु नारीहरूको लागि सबभन्दा रमाइलो चाड तीज नै हो भने पनि हुन्छ । यसपालि केही अगाडिदेखि नै पानी परिरहेको छ । मलाई झरी एकदम मनपर्छ । चारैतिर हरियाली देख्दा आनन्द आउँछ ।