मकवानपुर दुर्घटनाः बस चालक भन्छन्–स्टेरिङ नै घुमेन
मकवानपुरः मकवानपुरमा नौ जनाको ज्यान जाने गरी भएको दुर्घटना स्टेरिङ नकटेकाले भएको चालकले बताएका छन् ।
दुर्घटनाग्रस्त इमेज यातायातको ना ५ ख ४०६४ नम्बरको बसका चालक बद्रि खड्का पनि घाइते भएका छन् । अहिले हेटौडाको चुरेहिल अस्पतालमा उनको उपचार भइरहेको छ।
अस्पतालमा उपचाररत खड्काले भने–‘म मनहरी बजार पार गरी रमनटार पुगेको थिएँ । रातिको करिब सवा १२ बजेको थियो । प्रायः यात्रुहरु निदाईरहेका थिए । मेरो बसको स्पीड ६०-६५ थियो । मैले अगाडी रहेको ट्रकलाई ओभरटेक गर्ने प्रयास गरे । त्यो बेलासम्म बिपरित दिशाबाट कुनै सवारी साधन आएको देखेको थिईन,' उनले लामो श्वास तान्दै भने–‘तर जब मैले स्टेरिङ काटेर आफ्नो साईडमा बसलाई ल्याउँन खोजे तर, स्टेरिङ कटेन ।
केही छिनमा विपरित दिशाबाट बस आयो । सायद उसले मैले गाडी साईड लगाउन खोजको भन्ने सोचे होला, बसको स्पिड कम गरेनन् र आपसमा ठोक्कियो । त्यसपछि के भयो मलाई थाहा भएन । एम्बुलेसन्समा मेरो आँखा खुल्यो । मलाई उपचारको लागि हेटौँडा ल्याउँदै रहेछ ।'
काठमाडौंबाट गाईघाट जादै गरेको ना ५ ख ५०५५ नम्बरको अग्नी यातायातको बस र काँकडभित्ताबाट काठमाडौं आउँदै गरेको ना ५ ख ४०६४ नम्बरको ईमेज यातायातको बस आपसमा ठोक्किएर मनहरी ३ रमनटारमा दुर्घटना भएको हो ।दुर्घटनामा नौ जनाको मृत्यु भएको छ भने ३१ जना घाइते भएका छन् ।