इस्लामाबादः पाकिस्तानका प्रधानमन्त्री नवाज सरिफले पाकिस्तान आतंकवाद, भ्रष्टाचार र संगठित अपराधका विरुद्ध संघर्ष गर्न दक्षिण एसियाली क्षेत्रीय सहयोग संगठन (सार्क) का सदस्य मिलेर काम गर्ने प्रतिबद्धता व्यक्त गरेका छन् । सार्कका गृहमन्त्रीहरूको सम्मेलनको उद्घाटन कार्यक्रमलाई सम्बोधन गर्दै उनले यस्तो प्रतिबद्धता जनाएका हुन् ।
उनले पाकिस्तानका आदिवासी क्षेत्रमा आतंकवादविरोधी अभियान र राष्ट्रिय कार्ययोजना सुरु गरेको पनि दाबी गरे । आफ्नो सरकारले पाकिस्तानी भूमिमा कुनै पनि खालका आतंकवादलाई नियन्त्रण गर्ने वचनबद्धता व्यक्त गरे ।
सरिफले भने, ‘सार्क क्षेत्र मानव र प्राकृतिक संसाधनको विशाल भण्डार हो । यस क्षेत्रमा शान्ति र खुसीका लागि सार्कलाई उपयोग गर्नुपर्छ ।' आफ्नो सरकारले क्षेत्रीय शान्ति र छिमेकमा पनि शान्ति कायम भएको हेर्न चाहेको बताएका छन् ।
पाकिस्तानले सार्कले राखेका लक्ष्य र विचारलाई गति दिन गरिने हरेक कदमलाई समर्थन र सहयोग गरेको सरिफले बताए । सरिफले सार्क देशबीच प्रगति र खुसीका लागि आपसी सम्पर्कमा जोड दिनुपर्ने बताएका छन् । सार्क क्षेत्रमा सडक, हवाई र रेल सञ्जाल जोडिनु जरुरी रहेको खुलासा गरेका छन् । सार्क घोषणापत्रमा उल्लिखित उद्देश्य र लक्ष्य हासल गर्नु सार्ककै सामूहिक जिम्मेवारी भएको भन्दै यसतर्फ सजग हुन आह्वान पनि गरे ।
उद्घाटन सत्रलाई सम्बोधन गर्दै सार्कका महासचिव अर्जुनबहादुर थापाले आतंकवाद, मादक पदार्थ, साइबर अपराध र अन्य अन्तर्राष्ट्रिय अपराधबाट बच्न प्रभावकारी कदम चाल्नुपर्नेमा जोड दिए । उक्त बैठक विगतका बैठकमा गरिएका कार्यको समीक्षा गरिएको छ । सार्कमा अफगानिस्तान, बंगलादेश, भुटान, भारत, मालद्वीव, नेपाल, पाकिस्तान र श्रीलंका सहभागी छन् ।
३० करोड अमेरिकी डलर सहयोग रोक्का
वसिङटनः अमेरिकी रक्षा मन्त्रालय पेन्टागनले पाकिस्तानलाई प्रदान गरिने ३० करोड अमेरिकी डलर सैन्य सहयोग रोक्का गरेको छ । पाकिस्तानले आतंकवादी संगठन हक्कानी सञ्जालविरुद्ध कारबाही नगरेको भन्दै अमेरिकी रक्षामन्त्री एस्टन कार्टरले यस्तो जानकारी दिएका हुन् । अफगानिस्तानमा कार्यरत अमेरिकी सेनाको अभियानलाई सहयोग गरेबापत उक्त रकम पाक सेनालाई प्रदान गरिँदै आएको थियो ।
पेन्टागनका प्रवक्ता एडम स्टम्पले भने, ‘यसपटक बार पाकिस्तान सरकारलाई ३० करोड डलर दिइने छैन । रक्षामन्त्रीले पाकिस्तानले अमेरिकी सहयोगको भावनाअनुसार काम भएको पुष्टि गरेका छैनन् ।' पाकिस्तानका लागि यो आर्थिक वर्षमा १ अर्ब डलर रकम प्रदान गरिने घोषणा गरिएको थियो । हालसम्म ७० करोड डलर पाकिस्तानलाई उपलब्ध गराइसकिएको छ ।
प्रतिक्रिया दिनुहोस !
