ढाकामा ४६ नेपाली अलपत्र
काठमाडौं: एक बंगलादेशी मानव तस्करले जागिर लगाइदिने प्रलोभनमा ढाका पुर्याएर ४६ नेपालीलाई अलपत्र छाडेका छन् । ती नेपालीलाई उद्धार गरी स्वदेश फर्काउने प्रयास भइरहेको बंगलादेशस्थित कार्यवाहक नेपाली राजदूत धनबहादुर ओलीले अन्नपूर्णलाई टेलिफोनमा बताए ।
ओलीका अनुसार ढाकास्थित एक रेस्टुरेन्टमा जागिर लगाइदिने भन्दै ती बंगलादेशी दलालले उनीहरूलाई जेठ दोस्रो साता पर्यटक भिसामा त्यहाँ पुर्याएका थिए ।
सुरुमा पर्यटक भिसामा बंगलादेश पुर्याइएका उनीहरूको भिसाको म्याद सकिएपछि दलालले 'वर्किङ भिसा' मिलाइदिने भन्दै फसाएपछि उनीहरू गैरकानुनी ढंगले बस्न बाध्य भएका थिए । ती बंगलादेशी मानव तस्करले जागिर लगाइदिने प्रलोभनमा ४६ नेपालीबाट ८० लाख रुपयाँ उठाएको बताइएको छ । ठगिनेमा नेपालबाट 'बिजनेस भिसा' लिएर जानेहरूसमेत छन् ।
नेपालीलाई बिचल्ली पार्ने ती मानव तस्करलाई ढाका प्रहरीले फक्राउ गरेको छ । ती मानव तस्कर नेपाल आउजाउ गरेको समेत पाइएको छ । नयाँ बानेश्वरस्थित एक निजी स्वास्थ्य संस्थाको 'फिजिसियन कन्सल्टेन्ट' बाट लिएको परिचयपत्र ती दलालबाट ढाका प्रहरीले जफत गरेको छ ।
ढाका प्रहरीले उनीहरूको गैरकानुनी हैसियतबारे नेपाली दूतावासलाई जानकारी गराएपछि उनीहरूको उद्धार गरिएको थियो । उनीहरूलाई दूतावासकै रेखदेखमा ढाकामा राखिएको छ । 'आवश्यक प्रक्रिया पूरा गरी सबैलाई नेपाल फर्काइनेछ', ओलीले भने ।
परराष्ट्र मन्त्रालयका प्रवक्ता भरतराज पौड्यालले अलपत्र नेपालीलाई ढाकास्थित दूतावासको समन्वयमा स्वदेश फर्काउन पहल भइरहेको बताए ।
प्रतिक्रिया दिनुहोस !
