‘हिरो रिटर्न्स’मा रेखा थापा
काठमाडाैँ: लामो समय चर्चा भए पनि बन्ने-नबन्ने अनिश्चित रहेको ‘हिरो रिटर्न्स’ निर्माणको औपचारिक घोषणा गरिएको छ । नायक सबिन श्रेष्ठको प्रस्तुति रहने चलचित्रको घोषणा गरिएको हो । चलचित्रमा नायिका रेखा थापा, नायक सरोज खनाल, नायक दिल श्रेष्ठ र सबिन श्रेष्ठकोमुख्य भूमिका रहने छ ।
चलचित्र विकास बोर्डका अध्यक्ष राजकुमार राई, चलचित्र निर्देशक उज्ज्वल घिमिरे, चलचित्र निर्देशक समाजकी अध्यक्ष सुचित्रा श्रेष्ठ, चलचित्र पत्रकार संघका अध्यक्ष शान्तिप्रियले शुभकामना दिएका थिए ।
कार्यक्रममा बोल्दै नायिका रेखा थापाले सबिनको मन छुने प्रस्तावलाई आफूले नकार्न नसकेको बताइन् । चलचित्रमा आफू एक्सन अवतारमा नै प्रस्तुत हुने रेखाले बताइन् । रेखा फिल्म्स्कै ब्यानरमा बनेको चलचित्र ‘अन्दाज’बाट सबिनले चलचित्र क्षेत्रमा डेब्यु गरेका थिए ।
चलचित्रका निर्माता चन्द्र गौतमले ‘दमदार’पछि दोस्रो चलचित्र निर्माणमा लागेको बताए । चलचित्रमा सहदेव गौतम र भीम न्यौपानेको पनि लगानी रहनेछ । चलचित्रको निर्देशन आशीष भेटवालले गर्दैछन् । चलचित्रका कलाकार सरोज खनाल भने खलपात्रको भूमिकामा देखिनेछन् ।
प्रतिक्रिया दिनुहोस !
