मन्त्रिपरिषद् विस्तारको गृहकार्य

काठमाडौं: प्रधानमन्त्री पुष्पकमल दाहालले मन्त्रिपरिषद् विस्तारका लागि आफूलाई समर्थन गर्ने राजनीतिक दलका नेतासँग परामर्श थालेका छन् । माओवादी केन्द्रका तीन र कांग्रेसका दुई मन्त्रीलाई आफूसँगै शपथ गराएका प्रधानमन्त्री दाहालले मन्त्रिपरिषद् विस्तारका लागि शनिबार कांग्रेस सभापति शेरबहादुर देउवासँग उनकै निवास बूढानीलकण्ठ पुगेर छलफल गरे ।

'देउवासँग मन्त्रिपरिषद् विस्तार, मधेसी मोर्चासँग भएको तीनबुँदे सहमति र कांग्रेस–माओवादी केन्द्रबीच भएको सातबुँदे सहमतिलाई कार्यतालिका बनाएर कार्यान्वयनमा लैजानेबारेमा छलफल भएको हो', प्रधानमन्त्रीको सचिवालयका एक सदस्यले अन्नपूर्णसँग भने ।

स्रोतका अनुसार नेपाल विद्यार्थी संघको महाधिवेशन र राष्ट्रिय प्रजातन्त्र पार्टीको एकताप्रक्रियापछि मात्रै मन्त्रिपरिषद् विस्तार हुनेछ । राप्रपाको एकता र नेविसंघको महाधिवेशन साउन २५ गते सकिँदैछ । देउवाले दाहाललाई नेविसंघको महाधिवेशनपछि मन्त्रिपरिषद् विस्तार गर्न सुझाव दिएको स्रोतले बतायो ।

दाहालका छोरा प्रकाशका अनुसार शनिबार नै राष्ट्रिय प्रजातन्त्र पार्टीलाई दुईजना मन्त्रीको नाम पठाइदिन पत्र पठाइएको छ । प्रधानमन्त्री दाहालको पार्टी माओवादी केन्द्रभित्र पनि मन्त्री बन्ने आकांक्षी धेरै भएका कारण व्यवस्थापन गर्न कठिनाइ भइरहेको स्रोतले बतायो ।

 

प्रधानमन्त्री निर्वाचनमा आफ्ना पक्षमा मतदान गर्ने मधेसी मोर्चाका नेताहरूले भने संविधान संशोधनपछि मात्र सरकारमा सहभागी हुने जनाउ दिएका छन् । तर मोर्चाभित्र आठ मन्त्रालय लिएर सरकारमा सहभागी हुनुपर्ने आवाज पनि उठिरहेको छ ।

प्रधानमन्त्री दाहालसँगै बिहीबार उपप्रधान तथा गृहमन्त्रीमा विमलेन्द्र निधि, उपप्रधान तथा अर्थमन्त्रीमा कृष्णबहादुर महरा, भौतिक पूर्वाधार तथा यातायातमन्त्रीमा रमेश लेखक, कृषिमन्त्रीमा गौरीशंकर चौधरी, युवा तथा खेलकुदमन्त्रीमा दलजित श्रीपाइलीले शपथ लिएका थिए ।

यसैबीच प्रधानमन्त्री दाहालले आफ्नो कार्यकाललाई प्रभावकारी बनाउन अपवादबाहेक उद्घाटन र रिबन काट्ने कार्यक्रममा नअल्झिने बताएका छन् । दाहालले शनिबार बिहान आफ्नो सचिवालयका सदस्यलाई उद्घाटनका कार्यक्रममा आफूलाई सहभागी नगराउन निर्देशन दिए ।

गोरखा–काठमाडौं जनसम्पर्क मञ्चको पाँचौं एकता भेलामा शनिबार दिउँसो सहभागी भएका दाहालले भने, 'परिणाममुखी काम हुनुपर्छ भन्नेमा छु । यो कार्यक्रम प्रधानमन्त्री हुनुभन्दा पहिले नै तय भएकाले म आएँ । अब अपवादबाहेक उद्घाटनका कार्यक्रम र रिबन काट्ने काममा अल्झनेछैन ।'

माओवादी केन्द्रका नेता नारायणकाजी श्रेष्ठ, हितराज पाण्डे, देव गुरुङ, हरिराज अधिकारी, लेखनाथ न्यौपाने र अमृता थापामगर पनि सहभागी कार्यक्रममा दाहालले भने, 'संसद्मा हामी अहिले पनि तेस्रो दलकै रूपमा उपस्थित छौं तर १० माओवादीको एकतापछि हामी ठूलो दल बनेका छौं । एकतालाई जनतासम्म पुर्‌याएर जनआकांक्षा पूरा गर्नतिर लाग्नु अबको प्राथमिकता हो ।'

संविधानको परिमार्जनसहित कार्यान्वयन, भूकम्पपछिको पुनर्निर्माण र राहत, आर्थिक समृद्धि र जनआकांक्षाको परिपूर्ति सरकारको मुख्य कार्यभार रहेको पनि दाहालले बताए । आफ्ना अगाडि रहेका चुनौतीलाई होसियारीपूर्वक सामना गर्दै परिणाम निकाल्ने दाबी पनि दाहालले गरेका थिए ।