दुई राप्रपा एकीकरण
काठमाडौंः राष्ट्रिय प्रजातन्त्र पार्टी र राप्रपा नेपालबीच एकताको टुंगो लागेको छ । दुई पार्टीका अध्यक्षले शनिबार संयुक्त विज्ञप्ति जारी दुई पार्टी एक भएको घोषणा गरेका हुन् । हिन्दु राष्ट्रलाई एकीकरणको बटमलाइन बनाउने सहमतिका साथ दुई पार्टीले आगामी मंगलबार पार्टी एकताको औपचारिक घोषणा गर्ने भएका छन् ।
नयाँ संविधान घोषणा हुने क्रममा राप्रपाले धर्मनिरपेक्षता स्वीकारेको थियो भने राप्रपा नेपालले गणतान्त्रिक आन्दोलनदेखि नै हिन्दु धर्मको वकालत गर्दै आएको थियो । पछिल्लो समयमा राप्रपाभित्रैबाट पार्टीले हिन्दु राष्ट्रलाई बटमलाइन बनाउनुपर्ने दबाब बढेको थियो । राप्रपाका अध्यक्ष पशुपतिशमशेर राणा र राप्रपा नेपालका अध्यक्ष कमल थापाले संयुक्त विज्ञप्ति जारी गरी बलियो राष्ट्रवादी शक्ति निर्माणका गर्नका लागि दुवै पार्टीले मंगलबार एकता घोषणा गर्ने उल्लेख गरेका छन् ।
हिन्दु राष्ट्रलाई एकीकरणको बटमलाइन बनाउने सहमतिका साथ दुई पार्टीले आगामी मंगलबार पार्टी एकताको औपचारिक घोषणा गर्ने भएका छन् ।
यसअघि दुवै पार्टी एमाले अध्यक्ष केपी ओली सरकारमा सहभागी थिए । एमाओवादी केन्द्रले सरकारलाई दिएको समर्थन फिर्ता लिएपछि ओली र दाहालको पक्षमा विभाजित भएका थिए । त्यसपछि संसद्मा भएको प्रधानमन्त्री निर्वाचनमा राप्रपा नेपालले पुष्पकमल दाहालका विपक्षमा मतदान दिएको थियो भने राप्रपाले पक्षमा दिएको थियो ।
स्रोतका अनुसार दुवै पार्टीले दाहाल नेतृत्वको सरकारका जाने-नजाने भन्नेमा एकताअघि कुनै निर्णय नगर्ने सहमति गरेका छन् । यस विषयमा दुवै पार्टी एक भएपछि केन्द्रीय समितिमा छलफल गरेर निर्णय गर्ने सहमति पनि भएको छ ।
दुवै पार्टीमा एकतनका लागि बनेका कार्यदलले दिएको प्रतिवेदनलाई आधार मान्दै हिन्दु राष्ट्रलाई बटमलाइन मान्ने सहमति भएको राप्रपाका केन्द्रीय सदस्य राजेश गिरीले जानकारी दिए । पार्टी एक भएपछि पार्टीको नाम पनि राष्ट्रिय प्रजातन्त्र पार्टी रहने भएको छ । दुवै पार्टीका तर्फबाट एक सय ३० का दरले केन्द्रीय सदस्यमा सहभागी गराइने सहमति भएको छ ।
यसो गर्दा एकीकृत राप्रपाको केन्द्रीय समिति दुई सय ६० सदस्यीय हुनेछ । एकतापछि पशुपतिशमशेर राणा राष्ट्रिय अध्यक्ष र कमल थापा अध्यक्ष हुनेछन् । अध्यक्षलाई परामर्श गर्न पार्टीका शीर्ष नेता सम्मिलित परामर्श समिति रहने पनि सहमति भएको छ ।
एकतापछि राप्रपा नेपालको झन्डा प्रयोग गर्ने सहमति भएको छ भने चुनावचिह्न हलो र गाईमध्ये एउटाको छिनोफानो महाधिवेशनमा वा केन्द्रीय समितिले लगाउने सहमति भएको छ । पार्टीका जनवर्गीय संगठन र तल्ला कमिटीको हकमा भने केन्द्रीय समितिले खाका तयार गर्ने सहमति भएको गिरीले जानकारी दिए ।
प्रतिक्रिया दिनुहोस !
