वातावरणीय प्रदूषणबाट वार्षिक २० हजारको मृत्यु
मेक्सिको सिटीः मेक्सिकोमा वायु प्रदूषणबाट वर्षेनि कम्तीमा पनि २० हजारजनाको ज्यान जाने गरेको छ ।
मेक्सिकोको नेसनल इन्स्टिच्युट फर पब्लिक हेल्थले दिएको जानकारीअनुसार वर्षमा २० हजार नागरिकको वायु प्रदूषण र यससँग सम्बन्धित समस्याका कारण ज्यान जाने गरेको पाइएको छ ।
मेक्सिको सिटीमा आयोजित जलवायु परिवर्तनसम्बन्धी कार्यक्रममा बोल्दै उक्त संस्थाका निर्देशक माउरिको हर्नान्डेजले यस्तो जानकारी गराएका हुन् । उनका अनुसार मेक्सिकोमा वायु प्रदूषणको अवस्था अत्यन्तै घातक र डरलाग्दो गरी फैलिएको छ । यसका कारण मेक्सिकोका कम्तीमा पनि ११ वटा सहर प्रभावित भएका छन् ।
ती ११ सहरमा बस्ने दस लाखभन्दा बढी नागरिक वायु प्रदूषणको चपेटामा परिरहेका पनि उनले जानकारी दिएका छन् । मेक्सिकोमा भएका वायु प्रदूषणको अवस्था हेर्दा वार्षिक कम्तीमा पनि २० हजार मानिस यसै कारणले मृत्यु हुने गरेका छन् ।
यसबाट वर्षेनि लाखौं मानिस नराम्रोसँग प्रभावित हुने गरेका छन् । मेक्सिकाका विभिन्न सहरमा पछिल्ला वर्षहरूमा बढ्दै गएको वायु प्रदूषणका कारण श्वासप्रश्वास र मुटुको रोगको प्रकोप बढ्ने गरेको पाइएको उनले खलासा गरे । उनी मेक्सिकोको स्वास्थ्य मन्त्रालयको जनस्वास्थ्य महाशाखाको पनि प्रमुखका रूपमा रही काम गरिरहेका छन् ।
गत मार्च १ तारिखदेखि हालसम्म अनुसन्धान गरिएको एक तथ्यांकमा त्यस अवधिमा अस्पतालमा आएका विरामीमा श्वासप्रश्वास र मुटुका रोगीहरू बढी आएका थिए । उनीहरूको विमार वातावरणीय प्रदूषणका कारणले बढेको थियो ।
मेक्सिको सवारीसाधनहरू धेरै रहेको देशमा पर्छ । त्यस देशमा सञ्चालन हुने गरेका मोटर एवं यस्तै सवारीसाधनको मापदण्ड पनि त्यति स्वस्थ नरहेको बताइन्छ ।
प्रतिक्रिया दिनुहोस !
