ओलम्पिकमा फेलप्सलाई १९ औँ स्वर्ण
एजेन्सीः अमेरिकी पौडीबाज माइकल फेलप्सले ओलम्पिक खेलकुदमा १९ औं स्वर्ण पदक जितेका छन् । ३१ औं गृष्मकालीन ओलम्पिक खेलकुदको पौडीतर्फ आइतबार राति भएको चार गुना एक सय मिटर फ्रिस्टायल रिले स्पर्धामा स्वर्ण जितेसँगै फेलप्सले आफ्नो नाममा अर्काे ओलम्पिक स्वर्ण थलेका हुन् । ओलम्पिक खेलकुदमा १९ वटा स्वर्ण पदक जित्ने फेलप्स एक्ला खेलाडी हुन् ।
फेलप्सभन्दा पछि रुस (तात्कालीन सोभियत संघ) का जिम्न्यास्टिक खेलाडी लरिसा लात्निना, फिनल्यान्डका एथलेटिक्स खेलाडी पाभो नुरर्मी तथा अमेरिकाका पौडी खेलाडीद्वय मार्क स्पाइज र एथलेटिक्स खलाडी कार्ल लेविसले ओलम्पिकमा नौ—नौवटा स्वर्ण पदक जितेका छन् । फेलप्स ओलम्पिक खेलकुदमा व्यक्तिगत सर्वाधिक पदक जित्ने एक्ला खेलाडी पनि हुन् । उनले आइतबारको स्वर्णसहित ओलम्पिक खेलकुदमा आफ्नो पदकको संख्या २३ पुर्याएका छन्, जसमध्ये १९ स्वर्ण, दुई रजत र दुई कांस्य समावेश छन् ।
ओलम्पिक खेलकुदमा व्यक्तिगत सर्वाधिक पदक जित्ने खेलाडीको सूचीमा फ्लेप्सपछि सोभियत युनियनकी लात्निना छन् । उनले नौ स्वर्ण, पाँच रजत र चार कांस्य गरी कुल १८ वटा पदक जितेका छन् । अन्तर्राष्ट्रिय प्रतियोगिताबाट झन्डै दुई वर्ष टाढा रहेका फेलप्सलाई रियो ओलम्पिकको स्वर्णले थप उत्साही बनाएको छ ।
सन् २०१२ मा अन्तर्राष्ट्रिय प्रतियोगिताबाट सन्न्यास लिएका ३१ वर्षीय फेलप्स सन् २०१४ मा पुनः सक्रिय खेल जीवनमा फर्किएका थिए । त्यसयता रियो ओलम्पिकका लागि छनोट चरण पार गर्दै उनी ओलम्पिक खेलकुदका लागि धेरैपटक छनोट हुने पहिलो अमेरिकी पुरुष खेलाडीसमेत बनेका थिए ।
यो फेलप्सको पाँचौं ओलम्पिक सहभागिता हो । चार गुणा एक सय मिटर स्पर्धामा अमेरिकालाई स्वर्ण दिलाउन फेलप्सले महत्वपूर्ण भूमिका निर्वाह गरे । रिलेको दोस्रो चरणमा फेलप्सले आफ्ना साथी कइलेव ड्रेसेललाई साथ दिएका थिए । फ्लेप्सले पौडनुअघि ड्रेसेल फ्रान्सेली खेलाडीस“ग पछि परेका थिए । तर फ्लेप्सले उत्कृष्ट प्रदर्शन गर्दै आफ्नो टोलीलाई स्वर्ण दिलाउन मद्दत पुर्याए ।
अमेरिकी टोलीमा फेलप्स र ड्रेसेलसँगै रायन हेल्ड र नाथन एड्रिन पनि थिए । उक्त स्पर्धामा फ्रान्स दोस्रो र अस्टे«लिया तेस्रो भए । अमेरिकाले स्वर्णसहित फ्रान्सेली टोलीसँग बदला पनि लिएको छ । सन् २०१२ मा भएको लन्डन ओलम्पिकमा अमेरिकी टोलीलाई पछि पार्दै फ्रान्सेली टोलीले स्वर्ण पदक जितेको थियो । फ्लेप्स सन् २००४ देखि अमेरिकी रिले टोलीका सदस्य छन् ।
लेडिक्की, पिटी र सोस्ट्रोमको कीर्तिमान
पौडीका तीनवटा स्पर्धामा विश्व कीर्तिमान कायम भएका छन् । अमेरिकी पौडीबाज क्याटी लेडिक्कीले महिलातर्फको चार सय मिटर फ्रिस्टायलमा स्वर्णसहित विश्व कीर्तिमान कायम गरेकी हुन् । १९ वर्षीया लेडिक्कीले आफ्नै नाममा रहेको पुरानो कीर्तिमानमा सुधार गरेकी हुन् । उनले तीन मिनेट ५६.४६ सेकेन्डमा निर्धारित दूरी पूरा गरेकी थिइन् । उक्त स्पर्धामा चार मिनेट ०१.२३ सेकेन्डसहित बेलायतकी जाज कार्लिनले रजत र चार मिनेट ०१.९२ सेकेन्डसहित अमेरिकन लिह स्मिथले कांस्य पदक जिते ।
लेडिक्कीले रियो ओलम्पिकको दुई सय र आठ सय मिटर फ्रिस्टायल स्पर्धामा पनि प्रतिस्पर्धा गर्दैछिन् । यी दुवै स्पर्धामा उनी विश्व च्याम्पियन हुन् । महिलातर्फको चार सय, आठ सय र एक हजार पाँच सय मिटर स्पर्धाको विश्व कीर्तिमान पनि लेडिक्कीकै नाममा रहेको छ । एक हजार पाँच सय मिटर स्पर्धालाई भने रियो ओलम्पिकमा सहभागी गराइएको छैन ।
बेलायती पौडीबाज एडम पिटीले पुरुषतर्फको एक सय मिटर ब्रेस्टस्ट्रोक स्पर्धामा विश्व कीर्तिमानसहित स्वर्ण पदक जिते । उक्त स्पर्धामा उनले ५७.१३ सेकेन्डकाको नयाँ कीर्तिमान पनि बनाए । पिटीले हिट चरणमा गरेको ५७.५५ सेकेन्डको समयमा सुधार ल्याउँदै नयाँ कीर्तिमान बनाएका हुन् । उनले स्वर्ण पदक जित्दा साबिक विजेता दक्षिण अफ्रिकी खेलाडी भान डर बर्घ भने दोस्रो स्थानमा रहे ।
यसैगरी स्विडेनकी साराह सोस्ट्रोमले एक सय मिटर बटरफ्लाई स्पर्धामा नयाँ कीर्तिमान कायम गरिन् । सोस्ट्रोमले ५५.४८ सेकेन्डको नयाँ कीर्तिमान बनाएकी हुन् । उनले गत वर्ष भएको विश्व च्याम्पियनसिपमा आफूले गरेको ५५.६४ सेकेन्डको समयमा सुधार ल्याउँदै नयाँ कीर्तिमान कायम गरेकी हुन् । चार वर्षअघि लन्डनमा आयोजना भएको ओलम्पिक खेलकुदको यही स्पर्धामा चौथो बनेकी सोस्ट्रोम यस पटक भने विश्व कीर्तिमानसहित स्वर्ण जित्न सफल बनेकी हुन् । ओलम्पिक खेलकुदमा उनको यो पहिलो स्वर्ण पदक हो ।
भारोत्तोलनमा पनि विश्व कीर्तिमान
भारोत्तोलनमा पनि आइतबार राति नै विश्व कीर्तिमान कायम भएको छ । चीनका लङ क्विनक्वानले पुरुषतर्फको ५३ केजी तौलसमूहमा तीन सय सात केजी भार वहन गर्दै नयाँ कीर्तिमान कायम गरेका हुन् । क्विनक्वान आठ वर्षको अन्तरमा दोस्रो पटक ओलम्पिकमा स्वर्ण जित्ने पहिलो खेलाडी बनेका छन्।
उनले सन् २००८ मा आफ्नै देशले आयोजना गरेको ओलम्पिक खेलकुदमा पनि स्वर्ण जितेका थिए । त्यसपछिको लन्डन ओलम्पिकमा भने उनी स्वर्ण पदक जित्नबाट चुकेका थिए । लन्डन ओलम्पिकमा उत्तर कोरियाका ओम युन चोलले उक्त स्पर्धाको स्वर्ण पदक जितेका थिए । यस पटक फेरि क्विनक्वानले ओमलाई नै पछि पार्दै विश्व कीर्तिमानसहित स्वर्ण जित्न सफल भएका हुन् । पदक जितेपछि उनले आफ्नो रियो यात्रा सफल भएको प्रतिक्रिया दिए ।
कोरियाली टोलीलाई आठौं पटक स्वर्ण
ओलम्पिक खेलकुदमा दक्षिण कोरियाली आर्चरी टोलीले लगातार आठवटा ओलम्पिक खेलकुदमा स्वर्ण पदक जितेर नयाँ कीर्तिमान कायम गरेको छ । आइतबार भएको प्रतिस्पर्धामा फ्रान्सलाई ५–१ ले पछि पार्दै दक्षिण कोरियाले रियो ओलम्पिकको आर्चरीको टिम स्पर्धाको उपाधि आफ्नो पक्षमा पारेको हो । कोरियाली टोलीले सन् १९८८ मा आफ्नै देशमा आयोजित ओलम्पिक खेलकुदमा पहिलो पटक आर्चरीलाई समावेश गरेयता टिम स्पर्धामा लगातार स्वर्ण पदक जित्दै आएको छ ।
चीनकी ऊलाई डाइभिङमा पाँचौं स्वर्ण
चीनकी ऊ मिन्छियाले डाइभिङ स्पर्धामा लगातार पाँचवटा ओलम्पिकमा स्वर्ण पदक जित्दै नयाँ कीर्तिमान कायम गरेकी छिन् । आफ्नी साथी सी तिङ्माओसँग मिलेर कुल ३४५.६० अंक बटुलेकी चिनियाँ खेलाडी ऊले डाइभिङको महिला तीन मिटर सिन्क्रोनाइज्डतर्फ स्वर्ण पदक जितेकी हुन् ।
ऊले ओलम्पिक खेलकुदको तीन मिटर सिन्क्रोनाइज्ड स्पर्धामा स्वर्ण जितेको यो लगातार तेस्रो पटक हो । उनले यसअघि सन् २००४, सन् २००८ र सन् २०१२ को ओलम्पिकमा पनि फरकफरक साथीसँग मिलेर यही स्पर्धामा स्वर्ण जितेकी थिइन् । लन्डन ओलम्पिकमा तीन मिटर व्यक्तिगत स्पर्धामा समेत स्वर्ण पदक जितेकी ऊ ओलम्पिक खेलकुदमा सर्वाधिक पाँच स्वर्ण जित्ने पहिलो डाइभर बनेकी छन् ।