माओवादीका मन्त्री छान्ने जिम्मा प्रधानमन्त्री प्रचण्डलाई
काठमाडौँः नेकपा (माओवादी केन्द्र)ले आफनो पार्टीका पाँच मन्त्री छान्ने जिम्मा पार्टी अध्यक्ष समेत रहेका प्रधानमन्त्री पुष्पकमल दाहाल ‘प्रचण्ड’लाई दिएको छ । प्रधानमन्त्री निवास बालुवाटारमा मंगलबार बसेको केन्द्रीय कार्यालयको बैठकले मन्त्री छान्ने जिम्मा दाहाललाई दिएको हो ।
केन्द्रीय कार्यालयको सोमबार बसेको बैठकमा मन्त्रिहरुका बारेमा छलफल भएपनि निर्णय पनि हुन सकेन । स्रोतका अनुसार प्रमुख सत्ता साझेदार नेपाली काँग्रेसले मन्त्रिपरिषद विस्तार गर्न केहि दिन पर्खिदिन आग्रह गरेपछि मंगलबार नै माओवादी मन्त्रीहरु नछानिएका हुन ।
माओवादी शीर्ष नेताको सोमबारको बैठकले उर्जा मन्त्री जनार्दन शर्मा, सूचना तथा सञ्चार र प्रविधि मन्त्री राम कार्की, स्थानीय विकास तथा संघीय मामिला मन्त्री हितराज पाण्डे, कानुन मन्त्री प्रभु साह र शिक्षा मन्त्री डिआर पौडेल बनाउने निर्णय गरेको थियो ।
जनजाति र महिला प्रतिनिधित्व हुन नसेको बिषयमा पार्टी भित्रै असन्तुष्टी बढेपछि त्यसलाई मिलाउन मंगलबार केन्द्रीय कार्यालयको बैठक बोलाइएको थियो । स्रोतका अनुसार महिला र जनजातिको प्रतिनिधित्व गराउँदै राधिका तामाङलाई राज्यमन्त्री बनाएर लैजाने बारेमा नेताहरुबीच छलफल भएको छ ।
यसैबीच, बैठकले भदौ २ गतेका लागि बोलाइएको राष्ट्रिय महाधिवेशन आयोजक समितिको बैठक भदौ दोस्रो साता गर्ने निर्णय गरिएको प्रधानमन्त्री दाहालका प्रमुख स्वकीय सचिव जोखबहादुर महराले जानकारी दिए ।
प्रतिक्रिया दिनुहोस !
