अस्पतालमा प्रसूति गराउने बढे
धादिङः जिल्ला अस्पताल धादिङलगायत जिल्लाभरका स्वास्थ्य संस्थामा विगतका वर्षहरूमाभन्दा गएको आर्थिक वर्षमा प्रसूति गराउनेको संख्यामा वृद्धि भएको छ ।
सुरक्षित रूपमा बच्चा जन्माउने उद्देश्यले आमा सुरक्षा कार्यक्रम लागू भएपछि जिल्ला अस्पताल र स्वास्थ्य चौकीहरूमा बच्चा जन्माउने आमा बढेका हुन् ।
आर्थिक वर्ष ०७२/०७३ मा ८ सय ३९ जना गर्भवतीले जिल्ला अस्पतालमा आएर सुरक्षित रूपमा बच्चा जन्माएका छन् । यो संख्या आर्थिक वर्ष ०७१/०७२ को तुलनामा २ सय २२ जनाले बढी हो ।
जिल्ला अस्पताल धादिङका मेडिकल रेकर्डर सुपरभाइजर विनोद दाहालका अनुसार आर्थिक वर्ष २०६७/०६८ मा ४ सय ८५ जना, ०६८/६९ मा ४ सय ७३ जना, ०६९/७० मा ५ सय २९ जना, ०७०/७१ मा ६ सय जना, ०७१/७२ मा ६ सय १८ जना र ०७२/०७३ मा ८ सय ३९ जनाले सुरक्षित प्रसूति सेवा लिएका छन् ।
तथ्यांकगत रूपमा हेर्दा स्वास्थ्य संस्थामा सुत्केरी गराउने आमाहरूको संख्यामा वार्षिक रूपमा वृद्धि हुँदै गएको देखिन्छ । निःशुल्क सुरक्षित प्रसूति सेवा, न्यानो कपडा र यातयात खर्चसमेत पाइने भएपछि महिलाहरू सुत्केरी हुन अस्पताल आउन उत्साहित हुन थालेका छन् ।
स्वास्थ्य संस्थामा आएर प्रसूति गराउने महिलाहरूलाई प्रोत्साहन स्वरूप एक हजार रुपैयाँ बाटो खर्च, निःशुल्क प्रसूतिको सेवा, नियमित गर्भजाँच, आइरन चक्की खाने र टीटी सुई लगाउने, सुत्केरी सेवा उत्प्ररेणा भत्ता थप ४ सय दिने व्यवस्था रहेको जिल्ला अस्पताल धादिङका मेडिकल सुपरिटेन्डेन्ट रसिला अमात्यले जानकारी दिइन् ।
आर्थिक वर्ष ०७२/०७३ मा अस्पतालमा सुत्केरी हुन आएका ८ सय ८६ जना मध्ये ४८ जनालाई अन्यन्त्र रिफर गरिएको छ भने अन्यन्त्रबाट रिफर भएर ७ जनाको जिल्ला अस्पताल धादिङमा सुरक्षित रूपमा सुत्केरी गराउन सफल भएको जिल्ला अस्पताल धादिङले जनाएको छ । स्वास्थ्यकर्मीको निगरानीमा सुत्केरी गराउने क्रम बढेपछि बाल मृत्युदरमा पनि कमी आएको छ ।
आर्थिक वर्ष ०७२/०७३ मा जिल्ला अस्पताल धादिङमा सुत्केरी गराउन आउनेमध्ये मातृ मृत्युदर शून्य देखिएको छ भने बाल मृत्युदर शून्य दशमलब २४ प्रतिशत रहेको छ ।
सरकारी सूचीकृत स्वास्थ्य संस्थामा प्रसूति हुन आउनेलाई आमा र नवजात शिशुको स्याहार सुसारमा सहयोग पुर्याउने उद्देश्यले सरकारले न्यानो झोला उपहार दिने कार्यक्रमसमेत राखेको छ ।
उपहार स्वरूप दिइने न्यानो झोलामा आमालाई एक जोर लुगा, बच्चालाई टोपी, मोजा, र्यापर र नेम्फिन दुई/दुई जोरको व्यवस्था गरिएको हुन्छ । सरकारी प्रोत्साहनका कारण र सुरक्षित प्रसूतिको सेवा लिन अस्पतालममा सुत्केरी गराउनेको संखया वृद्धि हँदै गएको जिल्ला स्वास्थ्य कार्यलय धादिङका प्रमुख जीवनकुमार मल्लले बताए ।
जिल्लामा अहिले जिल्ला अस्पताल, ६७ वटा बर्थिङ सेन्टर, ४९ वटा स्वास्थ्य चौकी र २ वटा प्राथमिक स्वास्थ्य केन्द्रमा सुरक्षित प्रसूति सेवा सञ्चालित छन् । सबै केन्द्रमा दक्ष र तालिमप्राप्त स्वास्थ्यकर्मीबाट प्रसूति सेवा प्रदान गरिएको जिल्ला स्वास्थ्य कार्यालय धादिङले जनाएको छ ।
महिला स्वास्थ्य स्वंयसेविकाहरूको निरन्तर प्रचारप्रसार र आमा समूहहरूको सक्रियताका कारण पनि ग्रामीण क्षेत्रका महिलाहरूमा आमा र बच्चाको स्वास्थमा हेरचार पुर्याउन गर्भवती अवस्थादेखि नै स्वास्थ्य जाँच गराउनुपर्छ भन्ने चेतनाको विकास हँदै गएको मुरलीभन्ज्याङ स्वास्थ्य चौकीका प्रमुख बद्री पौडेलले बताए ।
प्रतिक्रिया दिनुहोस !
