भारतको सडक नेपालीलार्इ बनाउ भनेपछि...
धनगढी भारतीय भन्सारका कर्मचारीले गौरीफन्टा भन्सार आसपासका सडकमा परेका खाल्डाखुल्डी मर्मत गरिदिन नेपाली व्यापारीलाई आग्रह गरेका छन् । भारतीय भन्सारको गौरीफन्टाका सहायक इञ्चार्ज सुवोध चौबेले बुधबार कैलाली उद्योग वाणिज्य संघलाई धनगढीसँग सीमा जोडिएको भारतको गौरीफन्टा नाकाको सडक बनाइदिन आग्रह गरेका हुन् ।
कैलाली उद्योग वाणिज्य संघलाई आग्रह गरेपछि वरिष्ठ उपाध्यक्ष हिक्मत कुँवर र पूर्वअध्यक्ष दिनेशराज भण्डारीसहितको टोली बुधबार कष्टमका सहायक ईञ्चार्ज चौबेलाई भेट्न गौरीफन्टा गएका थिए ।
सीमा क्षेत्रमा भइरहेको अवैध असुली रोक्न दुबै देशका अधिकारीले सिसि क्यामेरा जडान गरेपनि रकम लिने बेला नेपाली मजदुरलाई सिसि क्यामेराको कभरेज भन्दा पर लगेर रकम लिइने गरिएको छ । गौरीफन्टाको कष्टम आसपासको सडकमा परेका खाल्डाखुल्डीमा ग्राभेल गरिदिन भारतीय पक्षले अनुरोध गरेको हो ।
'नेपाली ब्यापारीका गाडी बढी आउने भएकाले, सडक मर्मतका लागि आग्रह गरेपछि हामीहरू गौरीफन्टा गएका हौं', कैलाली उद्योग वाणिज्य संघका वरिष्ठ उपाध्यक्ष हिक्मत कुँबरले जानकारी दिए ।
कष्टमका कर्मचारीले नेपाली ब्यापारीका लागि सामान बोकेका गाडी, सडकमा पल्टिने गरेको, खाल्डाखुल्डीमा फस्ने गरेको र घण्टौंसम्म जाममा पर्ने गरेको भन्दै सडक मर्मत गरिदिन आग्रह गरेको बताइएको छ ।
आफ्नो राष्ट्रिय राजमार्गलाई ६ लेनको बनाइरहेको भारतले, नेपाली व्यापारीलाई यसरी आफ्नो क्षेत्रमा पर्ने सीमा सडक बनाउन भनेको यो पहिलो पटक भने होइन ।
यसअघि पनि धनगढीका केही व्यापारीले तीन लाख रकम गौरीफन्टाको सडक मर्मतका लागि दिएको खुलेको छ । भारतबाट चामल, तेल ल्याएर धनगढीमा आफ्नो लेबल टाँसेर बिक्री गरिरहेका मिल सञ्चालकले यसरी भारतीय सडक मर्मतका लागि रकम दिएका खुलेको छ ।
भारतले झण्डै २० किलोमिटर अघि आफ्नो बस्तीमा भने ६ लेनको राजमार्ग बनाइरहेको छ । सीमा क्षेत्रसम्मको सडक निर्माण कार्य पनि भारतीय लोक निर्माण विभागको योजनामा परिसकेको छ ।
भारतबाट मजदुरी गरेर नेपाल फर्किने नेपालीबाट अवैध रुपमा मनपरी असुली गरिरहने भारतीय कष्टमकर्मीले बेलाबेला नेपाली व्यापारीलाई सडक मर्मतका नाममा रकम माग्ने र आफैं निर्माण गर्छु भनेर रकम कुम्ल्याउने गरेको सीमा क्षेत्रका बासिन्दा बताउँछन् ।
हुन त, सिंगल लेनको भारतको पलिया–गौरीफन्टा सडक दुधवा नेशनल पार्कमा पर्ने भएकाले अहिलेसम्म मर्मत भने गरिएको छैन । केही भारतीय परिवहन निगम रोडबेजका गाडी बाहेक बाँकी सबै नेपाली व्यापारीको सामान बोकेका गाडी आउने भएकाले कष्टमका कर्मचारीले सडक मर्मतका लागि नेपाली व्यापारीलाई नै भन्ने गरेका छन् ।
गौरीफन्टाको कष्टम आसपासको सडकमा ठूला ठूला खल्डाखुल्डी परेकाले, बुधबार बिहान त्यहाँ पुगेका एलपी ग्यास बोकेका चारवटा बुलेट पनि गौरीफन्टामा रोकिएका उपाध्यक्ष कुँवरले बताए ।
बुधबार अपराह्नसम्म जीर्ण सडकमा एउटा ट्रक फसेपछि २०/२२ वटा मालबाहक ट्रक पनि रोकिएका थिए । यसबारेमा कैलाली उद्योग वाणिज्य संघले नेपाली बढी प्रभावित भएको भन्दै, बिहीबार बिहान धनगढीका ब्यापारीलाई बोलाएर त्यसबारे छलफल गर्ने जनाएको छ ।
उपाध्यक्ष कुवँरले, गौरीफन्टाको सीमा सडकमा प्रशासनले ईंटाका टुक्रा मात्रै लैजान दिएमा सडक मर्मत गर्न सकिने बताए ।
नेपालबाट भारततर्फ ग्राभेल, ढुंगा बालुवा, गिट्टी र ईंटाका टुक्रा लैजान पाईदैन । कैलाली उद्योग वाणिज्य संघले बिहीबार नै कैलालीका प्रमुख जिल्ला अधिकारी गोविन्द रिजाललाई सडक मर्मत सामाग्री लैजान दिन अनुरोध गर्ने पनि जनाएको छ ।
प्रतिक्रिया दिनुहोस !
