‘दलालीले ‘कालो कोट बदनाम‘

काठमाडौंः प्रधानन्यायाधीश सुशीला कार्कीले कानुन व्यवसायीहरूले पेसागत मर्यादा र निष्ठा छोडेर सम्पत्तिका लागि मरिहत्ते गर्ने प्रवृत्ति मौलाएका कारण कानुन व्यवसायी पेसा नै बदनाम हुन पुगेको बताएकी छन् ।

कार्कीले कतिपय कानुन व्यवसायीहरू मुद्दा लडेका सेवाग्राहीलाई खरानी बनाएर सबै सम्पत्ति लिन उद्यत रहेको भनाइसमेत राखिन् । नेपाल कानुन व्यवसायी परिषद्को वार्षिकोत्सवमा बिहीबार कार्कीले कानुन व्यवसायीप्रति यस्तो असन्तुष्टि राखेकी हुन् ।

कार्यक्रममा सर्वोच्चका वरिष्ठ न्यायाधीश गोपाल पराजुली, महान्यायाधिवक्ता रमनकुमार श्रेष्ठ, बार अध्यक्ष शेरबहादुर केसी, वरिष्ठ अधिवक्ता, कानुनका प्राध्यापक, कर्मचारी एवं अन्य लब्धप्रतिष्ठित कानुन व्यवसायीसमेत सहभागी थिए । ‘कानुन व्यवसायी भएर यस्तो कार्य गर्नु निष्ठामाथिको विचलन हो', उनले भनिन् । मुद्दा लडेको व्यक्तिलाई सक्षम बनाउनुको साटो सबै सम्पत्ति हडप्ने प्रवृत्तिले कानुन व्यवसायीलाई शोषक र सामन्तजस्तो बनाउने उनले बताइन् ।

कतिपय कानुन व्यवसायीले कालो कोटको आवरणमा जग्गा दलालसँग मिलोमतो गर्दै गैर काननी रुपमा पैसा आर्जन गरेका छन् । 

कतिपय कानुन व्यवसायीले कालो कोटको आवरणमा जग्गा दलालसँग मिलोमतो गर्दै गैरकानुनी रूपमा पैसा आर्जन गरेको तिक्ततासमेत उनले पोखिन् । त्यस्ता व्यवसायीलाई आफूले सर्वोच्च अदालतमा प्रवेश गर्न नदिन निर्देशन नै दिनुपरेको भनाइ कार्कीको थियो ।

‘पेसागत मर्यादाविपरीत सम्पत्तिका लागि जस्तोसुकै काम गर्न तयार हुने प्रवृत्ति मौलाएको छ', पेसालाई मर्यादित बनाउन सुझाव दिँदै कार्कीले असन्तुष्टि व्यक्त गरिन् । उनले नेपाल बार एसोसिएसनसँग पनि असन्तुष्टि जनाइन् । ‘बारले अदालतलाई बलियो बनाउनतिर ध्यान दिनुभन्दा राजनीति गरेको छ', उनले भनिन् । बारले सर्वोच्च अदालतमा नवनियुक्त ११ जना न्यायाधीशका विषयमा राजनीति गरेकोतर्फ कार्कीको भनाइ लक्षित थियो ।

कार्कीले  एक प्रसंगमा समावेशी सिद्धान्तअनुसार आफूले जिल्ला र पुनरावेदन अदालतका न्यायाधीश नियुक्तिमा जोड दिने बताइन् ।

कानुन व्यवसायी परिषद्का अध्यक्ष रहेका महान्यायाधिवक्ता रमनकुमार श्रेष्ठले पनि बारले राजनीति गरेको स्वीकार गरे । ‘पेसा व्यवसायीको हकहितभन्दा बारले राजनीति बढी नै गरेको कुरा यथार्थ हो । यसले न्यायालय र कानुन व्यवसायीबीच मनमुटाव पनि ल्याएको छ', श्रेष्ठले भने, ‘यता २०५६ सालदेखि बारसँग भएका सम्झौता सर्वोच्चबाट पनि कार्यान्वयन भएको छैन ।

कतिसम्म भने बार बेन्च समन्वय समितिको बैठकसमेत बस्न सकेन ।' श्रेष्ठले बारसँग छलफलै नगरी वास्ता नगरेको भन्न नमिल्ने पनि बताए । उनले कानुन व्यवसायीको मर्यादा बढाउन लागिपर्ने प्रतिबद्धता व्यक्त गरे ।

कार्यक्रममा प्रधानन्यायाधीश कार्कीबाट ‘प्रमाण कानुन' का सर्जक गोपालप्रसाद दहाल र कानुन व्यवसायी परीक्षामा उत्कृष्ट १६ परीक्षार्थीलाई पुरस्कार र प्रमाणपत्र प्रदान गरियो ।