एघारौं क्विक्स् ग्रिनल्यान्ड अन्तरविद्यालय बास्केटबल
काठमाडौंः एघारौं क्विक्स् ग्रिनल्यान्ड अन्तरविद्यालय बास्केटबल प्रतियोगिताअन्तर्गत शुक्रबार भएको खेलमा आयोजक ग्रिनल्यान्ड स्कुलले स्काइलार्कमाथि ५८-५६ को रोमाञ्चक जित हात पारेको छ ।
सिनियर ब्वाइजअन्तर्गत स्काइलार्क विरुद्धको खेलमा अन्तिम मिनेट अघिसम्म ५२-५६ ले पछि परेको ग्रिनल्यान्डले दिलीप पुनमगरको उत्कृष्ट प्रदर्शनबाट नतिजा आफ्नो पक्षमा पारेको थियो । दिलीपले लगातार दुईवटा थ्री-प्वाइन्टर प्रहार गरेका थिए । खेलभर बेजोड प्रदर्शन गरेका दिलीपले महत्वपूर्ण २२ अंकको योगदान दिए ।
जुनियर ब्वाइजमा पनि ग्रिनल्यान्डले दोस्रो जित निकालेको छ । अस्मित बम्जनको सर्वाधिक १५ स्कोरको मद्दतमा ग्रिनल्यान्डले बाल विकासलाई ३१-१२ को फराकिलो अन्तरले हरायो ।
जुनियर ब्वाइजककै अन्य खेलमा एचएचसीएले बीएनएलाई ३४-२६ ले हराउँदा नेरिकले सेन्ट जोसेफलाई ३२-१२ ले रोक्यो । त्यस्तै ओडीसीले नवजीवनलाई १५-४ ले तथा एन्जल लडले मनास्लुलाई ३५-१५ ले हराए ।
धापासीस्थित ग्रिनल्यान्ड स्कुुलको कोटमा भएको सिनियर ब्वाइजको अन्य खेलमा दीपज्योति, एचएचसीए र पोलेसीले जित निकालेका छन् । दीपज्योतिले ह्वाइटहवनलाई २८-७ ले एचएचसीएले बीएनएलाई ६०-३९ ले तथा पोलेसीले नवजीवनलाई ३७-१९ ले हराउन सफल भए ।
प्रतिक्रिया दिनुहोस !
