अनुदानले पशुबिमामा आकर्षण
सिन्धुलीः जिल्लामा व्यावसायिक पशुपालन गर्ने कृषकको संख्यामा वृद्धिसँगै पशु बिमा गर्ने कृषकको संख्या पनि बढेको पशु सेवा कार्यालय सिन्धुलीले जनाएको छ ।
आर्थिक वर्ष २०७२/७३ सम्ममा पशु सेवा कार्यालयमा एक सय १९ गाई फर्म, दुई सय ८२ बाख्रा फर्म, एक सय ५३ बंगुर फर्म र एक सय ६५ कुखुरा फर्म दर्ता भई सञ्चालनमा रहेको कार्यालयले जनाएको छ । कार्यालयले गत आर्थिक वर्षमा पशुपालन व्यावसाय प्रवद्र्धन गर्न गाई, बंगुर तथा बाख्रा पाल्ने ४९ कृषकलाई ५१ लाख अनुदान रकम वितरण गरेको थियो ।
सरकारले दिएको अनुदानका कारण ग्रामीण क्षेत्रका कृषक पशुपालनमा आकर्षित बन्दै गएका छन् । जिल्लामा बढी मात्रामा कृषकले बाख्रा पालेका छन् भने गाई र सुँगुर पाल्ने कृषकको संख्या पनि पछिल्लो समय वृद्धि हुँदै गएको कार्यालयले जनाएको छ ।
गाउँ–गाउँमा कृषकले फर्म दर्ता गरी व्यावसायिक पशुपालन सुरु गरेसँगै पशु बिमासमेत बढ्दै गएको छ । अघिल्लो वर्षको तुलनामा गत आवमा पशु बिमा ४३ प्रतिशतले वृद्धि भएको कार्यालय प्रमुख डा. हरिकुमार रघु श्रेष्ठ बताउँछन् । कार्यालयले अघिल्लो वर्ष कृषकका ६ सय ४८ पशुको बिमा गरेको थियो भने गत वर्ष त्यो संख्यामा वृद्धि भएर ११ सय ३८ पुगेको छ ।
आर्थिक वर्ष २०७२/७३ मा एक सय ७६ गाई, एक सय २५ भैंसी, चार सय बंगुर र चार सय ८२ बाख्राको बिमा गरिएको र १० लाख ३४ हजार ९३ रुपैयाँ प्रिमियम रकम जम्मा भएको कार्यालय प्रमुख श्रेष्ठले जानकारी दिए ।
सरकारले पशुपालक किसानलाई हौसला प्रदान गर्दै व्यावसायिक पशुपालन बढाउन अगाडि सारेको पशु बिमा कार्यक्रम प्रभावकारी बन्दै गएको जिल्ला पशु सेवा कार्यालयले जनाएको छ । पशुपालन व्यवसायमा हुन सक्ने विभिन्न जोखिमबाट ढुक्क बन्न आफूले पालेका पशुको बिमा गराउन किसानलाई कार्यालयले आग्रहसमेत गरेको छ ।
सरकारबाट मान्यता प्राप्त विभिन्न १७ बिमा कम्पनीमार्फत पशु बिमा गर्न सकिने पशु सेवा कार्यालयले जनाएको छ । पशु बिमा गर्दा लाग्ने कुल खर्चको ७५ प्रतिशत रकम सरकारले अनुदानबापत बिमा कम्पनीलाई भुक्तानी गरिदिन थालेपछि बिमा गर्न क्रम बढेको हो । बिमाको प्रक्रियाअनुसार बिमा गर्ने पशुको स्वास्थ्य जाँच गरी कानमा चिह्न लगाइन्छ ।
पशु बिमा गर्दा लाग्ने कुल खर्चको ७५ प्रतिशत रकम सरकारले अनुदानबापत बिमा कम्पनीलाई भुक्तानी गरिदिन थालेपछि बिमा गर्न क्रम बढेको हो ।
पशु चिकित्सकले स्वास्थ्य परीक्षण प्रमाणपत्र दिएपछि मूल्यांकन गरी बिमा कम्पनीलाई प्रस्तावको रूपमा पठाउने गरिन्छ । कम्पनीबाट फाइनल भएर आएपछि बिमा हुने गरेको छ । एउटा पशुको न्यूनतम ४५ हजारदेखि एक लाख ५० हजार रुपैयासम्मको बिमा हुने गरेको छ । एक वर्षभित्रै बिमा गरेको पशु मरेमा मूल्यांकन भएअनुसारको क्षतिपूर्ति पशुधनीले पाउँछन् ।
प्रतिक्रिया दिनुहोस !
