टेलिकमद्वारा माइक्रोवेब रेडियो लिंक विस्तार
काठमाडौं ः नेपाल टेलिकमले गत शनिबारदेखि ७५ वटै जिल्लामा माइक्रोवेभ रेडियो लिंकको पहुँच विस्तार गरी सेवा सञ्चालनमा ल्याएको छ ।
यसअघि कर्णाली अञ्चलका मुगु, हुम्ला र डोल्पा जिल्लाका सदरमुकाममा स्याटेलाइट प्रविधिमार्फत सेवा उपलब्ध गराइँदै आएको थियो । सेवा उपभोगका सन्दर्भमा विभिन्न कठिनाइको सामना गर्नुपर्ने स्थिति रहेकोले त्यसलाई अन्त्य गरि टेलिकमले यो सेवा सञ्चालनमा ल्याएको हो ।
माइक्रोवेब लिंक स्थापनापश्चात् एक सय ७० एमबीपीएसको लिंकमार्फत ल्यान्डलाइन, जीएसएम, सीडीएमएका टेलिफोन सेवा तथा एडीएसएल, टुजी, इभिडिओ इन्टरनेट सेवाको डाटा क्षमतामा उल्लेख्य सुधार हुने टेलिकमले जनाएको छ । साथै टेलिकमले भविष्यमा थ्रिजी र वाइम्याक्स सेवा पनि सञ्चालन गर्ने जनाएको छ ।
टेलिकमले शनिबार ७५औं जिल्लाको रूपमा हुम्लाको सिमिकोटमा सो प्रविधिमार्फत सेवा उपलब्ध गराउन थालेको हो । यसअघि गत असार २१ गते डोल्पा जिल्लामा र त्यसअघि मुगु जिल्लामा माइक्रोवेब रेडियो लिंकको पहुँच पुर्याएको कम्पनीले जनाएको छ ।
यसबाट कर्णालीबासी उपभोक्ताले अधिकतम लाभ प्राप्त गर्ने अपेक्षा गरिएको टेलिकमको भनाइ छ ।
प्रतिक्रिया दिनुहोस !
