जनकपुरमा कृष्णाष्टमी

जनकपुरधामः त्रेतायुगमा भगवान् कृष्णको जन्म भएको दिवसलाई भदौ महिनाको अष्टमी तिथिमा उत्सवका रूपमा मनाउने परम्परा छ । त्यही अनुरुप जनकपुरमा राधाकृष्णको प्रतिमा ठाउँठाउँमा स्थापना गरी कृष्णजन्माष्टमी पर्व सुरु भएको छ ।

जनकपुरमा टोलटोलमा राधाकृष्णको माटोको प्रतिमा स्थापना गरी कृष्णाष्टमी मनाउने गरिन्छ । रेल्वे स्टेसन चोकमा रेल्वे स्टेसन युवा कमिटीले यस वर्ष पनि कृष्णाष्टमी मेला आयोजना गरेको हो ।

५० वर्षदेखि रेल्वे स्टेसनमा हुने गरेको कृष्णजन्माष्टमी मेला यस क्षेत्रको ठूलो मेला हो । माटोको कृष्ण, राधा, यशोदा, वासुदेव र अन्य देवीदेवताका कलात्मक प्रतिमा बनाउन एक लाख रुपैयाँजति खर्च लागेको र सम्पूर्ण पूजा व्यवस्थापन गर्दै मेला लगाउन पाँच लाख रुपैयाँ खर्च भएको समितिका संयोजक शत्रुघ्न साहले बताए ।

समितिले प्रतिमा स्थापना गरेर रमणीय पंडाल बनाउनुका साथै मेलामा भजनकीर्तनको समेत व्यवस्था गरिएको साहले जानकारी गराए । बिहीबारबाट हुने पूजाका लागि बुधबार नै कुम्हारकहाँबाट प्रतिमा पूजास्थलमा लगिएको हो ।

कृष्णाष्टमीका लागि प्रतिमा घरमा बसाएर तथा टोलहरूमा सामूहिक रूपले पूजा गर्नका लागि तयारी पूर्ण भएको स्थानीय मनोज झाले बताए । तराईमा सरस्वती पूजा, दसैं र विश्वकर्मा पूजामा प्रतिमा स्थापना गरेर पूजा गरिएझैं कृष्णाष्टमीमा पनि प्रतिमा स्थापना गर्ने चलन पुरानो रहेको झाले बताए ।

धनुषाका गाउँगाउँमा युवाहरूले चन्दा संकलन गरी प्रतिमा स्थापना गरेर पूजा गर्ने गरेका छन् । प्रतिमाहरूको मूल्य चार हजार देखि ७० हजार रुपैयाँसम्म हुने कुम्हाले रामलोचन पण्डितले बताए ।

कृष्णाष्टमीको पहिलो दिन बिहीबार राधाकृष्णको प्रतिमा विधिवत् स्थापना गरी राति १२ बजे कृष्णजन्म मनाउने गरिन्छ । भोलिपल्ट जन्मोत्सवको अवसरमा मेला आयोजना गर्ने र घरमा पूजा गर्नेहरूले दिनभरि पूजा गर्दै राति जाग्राम बसेर भजनकीर्तन गर्ने र शनिबार प्रतिमालाई पवित्र जलाशयमा सेलाउने परम्परा छ ।