सय भाडा लाग्ने ठाउँमा हजार रुपैयाँ तिर्दै

चरीकोटः दोलखाको लापिलाङ गाविस ६ की अम्बिका भण्डारी बिहीबार चरीकोटमा यताउता भौतारिँदै थिइन् । संस्थाको कामको लागि गाउँबाट चरीकोट आएकी भण्डारी आमा बुबा बिरामी भएको खबर सुनेपछि हस्याङफस्याङ गर्दै कोठाबाट बजार झरेकी हुन् ।

बजार झरेर उनी गाउँ जाने बोलेरो खोज्न थालिन् । बोलेरो त पाइन् तर बेहोस हुने भडादर सुनेपछि केही समय अलमलमा परिन् । तर जति परे पनि उनलाई घर जानैपर्ने थियो । उनी अन्य समय बस चल्दा एक सय ४० रुपैयाँ भाडा तिरे घर पुग्थिन् भने यो पटक घर पुग्न उनले एक हजार रुपैयाँ तिर्नुपर्ने भयो ।

उनीजस्तै सयौं यात्रु यति बेला चर्को मूल्य तिरेर यात्रा गर्न बाध्य भएका छन् । लामो समयदेखि सरकारले रुट परमिट नलिएका सडकमा सार्वजनिक यातायातका कुनै पनि साधान सञ्चालन नगर्न निर्देशन दिएपछि दोलखाका स्थानीयले यसरी चर्को मूल्य तिरेर सदरमुकाम चरीकोट आवतजावत गर्न बाध्य भएका छन् ।

यात्रा गर्नै पर्ने बाध्यता भएका कारण जति मूल्य पनि तिर्न बाध्य भएको यात्रुको भनाइ छ । प्रहरीलाई खबर गरे आफूहरूले नै यात्रा गर्न नपाउने अवस्था आउने भएकाले पनि चुपचाप मागे जति भाडा तिर्ने गरेको स्थानीय रमेश खत्रीले बताए ।

बोलेरोहरूले सिट क्षमताभन्दा बढी यात्रु नबोक्ने भने पनि प्रहरीको आँखा छलेर भए पनि यात्रु ओसारपसार गरिरहेको स्थानीयको भनाइ छ । यात्राका क्रममा प्रहरी चेकजाँच भएको ठाउँमा आफूहरूलाई ओराल्ने गरेको र पछि चढाएर पुनःयात्रा गराउने गरेको सानु पाख्रिनले जानकारी दिए ।

बोलेरोले किरातीछापबाट चरीकोटसम्म आएको दुई सय रुपैयाँ लिएको सामुदायिक वन उपभोक्ता महासंघ दोलखाका अध्यक्ष कमला बस्नेतको भनाइ छ । बोलेरो चालकसँग बिल माग्दा उल्टै गाली गरेको बताउँदै उनले प्रमाण नभएका कारण प्रहरीसमक्ष उजुरी नगरेको सुनाइन् । किरातीछापबाट चरीकोट आएको भाँडा १५ रुपैयाँ हो । ६ दिनदेखि रुट परमिट नलिएका सडकमा यात्रुवाहक बस सञ्चालन हुन सकेका छैनन् ।

यसैबीच प्रमुख जिल्ला अधिकारी पुष्पराज शाहीले अस्थायी रुट परमिटका लागि यातायात व्यवस्था विभागमा सडकको नामावली पठाइसकेको बताउँदै कहिलेबाट यातायात सञ्चालन हुने भन्ने विषयमा आफूलाई पनि जानकारी नभएको बताए । यातायात व्यवसायीले छिटोभन्दा छिटो रुट परमिट लिएर जनतालाई सेवा दिनु पर्छ भन्ने पक्षमा आफूहरू रहेको बताएका छन् ।