रक्सी खान आउने भारतीयका कारण सीमा क्षेत्रमा असुरक्षा

रक्सी खान आउने भारतीयका कारण सीमा क्षेत्रमा असुरक्षा

वीरगन्जः भारतको बिहारमा मदिरापान, बिक्रीवितरण र ओसारपसारमा प्रतिबन्ध लगाइएपछि बिहारको सीमासँग जोडिएका पर्साको ग्रामीण भेगमा मदिरा पिउन आउने भारतीयका कारण असुरक्षा बढेको छ ।

नेपालको सीमा क्षेत्रमा रहेका मदिरा पसलमा रक्सी पिउन आउने भारतीयले होहल्ला र झगडा गर्ने, सडकमा हिँड्ने युवती र महिलालाई जिस्क्याउनेजस्ता अवाञ्छित गतिविधि गर्ने गरेका छन् ।

बिहारसँग सीमा जोडिएका पर्साको गाउँ र बजारमा दर्जनौंको संख्यामा अवैध रूपमा रक्सीभट्टीहरू सञ्चालनमा रहेका कारण महिलाहरूलाई बाटो हिँड्न तथा साँझ पर्नेबितिक्कै घरबाट बाहिर निस्किनसमेत समस्या भइरहेको स्थानीयले बताएका छन् ।

‘बोर्डर पार गरेर बिहारका मान्छे रक्सी खान हाम्रो गाउँमा आउँछन् । रक्सी खाएर रातिसम्म होहल्ला गर्छन्’, भिस्वा गाविसकी निलम देवीले भनिन्, ‘अचेल साँझ पर्ने बित्तिक्कै सडकमा हिँड्न त के घरबाट बाहिर निस्कन पनि डर लाग्छ ।’

बिहारमा त्यहाँको सरकारले मदिरा पिउन र बिक्रीवतरण गर्न प्रतिबन्ध लगाएपछि सीमावर्ती नेपाली गाउँ र बजारमा मदिरा पसल, रक्सी भट्टी र झुप्रे होटेलहरूको संख्या पनि बढेको छ । सीमावर्ती क्षेत्रबाट भारततर्फ घरेलु र सिलबन्दी दुवै किसिमका मदिराको तस्करी पनि बढेको छ ।

बिहारसँग सीमा जोडिएका पर्साका भिस्वा, जानकीटोला, महादेवपट्टी, सुवर्णपुर, शंकरसरैयालगायत गाविसमा दर्जनौंको संख्यामा अवैध घरेलु रक्सी भट्टी सञ्चालनमा रहेको र त्यहाँबाट उत्पादित घरेलु मदिरा भारतका विभिन्न स्थानमा तस्करी हुँदै आएको लंगडीका लालबाबु बानियाँले बताए ।

‘बिहारमा प्रतिबन्ध लागेपछि यहाँ रक्सीको कारोबार बढेको छ’, उनले भने, ‘बिहारबाट रक्सी पिउनेहरू धेरै आउने गरेका छन्, तस्करी पनि भइरहेको छ ।’

रक्सी खान आउने भारतीयहरूका कारण राति अबेरसम्म मदिरा पसल र भट्टी खुल्दा होहल्लाका कारण बालबालिकाको पढाइलेखाइमा नराम्रो असर पारेको बानियाँले बताए ।

रक्सी खान आउने भारतीयका कारण गाउँको वातावरण बिग्रिएको भन्दै स्थानीयले सीमावर्ती क्षेत्रका मदिरा पसल र भट्टी बन्द गर्न स्थानीय प्रशासनसँग माग गरेका छन् ।मुख जिल्ला अधिकारी संयोजक रहेको जिल्ला सुरक्षा समितिको भदौ ५ गते बसेको बैठकले भारतसँग सीमा जोडिएको दसगजा क्षेत्रभन्दा पाँच सय मिटरवरपर मदिरा बिक्रीवितरण, सेवन र ओसारपसार गर्न नदिने निर्णय गरेको छ ।

नेपालतर्फको दसगजादेखि पाँच सय मिटर क्षेत्रमा अहिले सञ्चालनमा रहेका मदिरा पसल एक साताभित्र नहटाइए कारबाही गर्ने निर्णय पनि सुरक्षा समितिको बैठकले गरेको छ । जिल्ला सुरक्षा समिति पर्साले सीमावर्ती क्षेत्रमा मदिराको बिक्रीवितरण र ओसारपसारमा कडाइ गर्ने निर्णय गरेको समितिका सदस्य पर्साका प्रहरी उपरीक्षक राजुबाबु श्रेष्ठले बताए ।

 


प्रतिक्रिया दिनुहोस !

Unity

working together is no longer optional-it is a matter of compulsion

Annapurna Media Network has announced the Unity for Sustainability campaign which comes into force from January 1, 2022. The main aim of this campaign is to 'lead the climate change dialogue' working closely with all the stakeholders on sustainable development mode, particulary focusing on climate-change issues.