मेहनत कम रोमान्स बढी

सुरेश पोखरेलले कम्प्युटर एप्लिकेसनमा बीसीए गरेका छन् । प्यूठानको पकला गाविसमा जन्मिएका उनी 'राम्रो कमाउन' कतार हानिए । त्यहाँ बस्दा राम्रै थियो । विस्तारै पोख्रेलको संगत नेपालबाट जाने कलाकारहरूसँग हुन थाल्यो । 'कतारमा नेपालका अधिकांश कलाकार कार्यक्रम प्रस्तुत गर्न जान्छन्', पोखरेलले भने, 'म कलाकारितामै मोहित भएँ ।'

कमाउने सपना बोकेर मुलुक छोडेका सुरेशलाई कलाकारिताको मोहले नेपाल तान्यो । दुर्गम प्यूठानमा आमा चन्द्रकला र बुवा देवप्रसाद पोखरेलले कम्प्युटर इन्जिनियर बन भन्दा उनले मानेनन् । विदेश हानिए । 'भित्रैदेखि इच्छा जागेमात्रै जे पनि हुँदो रहेछ', सुरेशले अनुभव सुनाए, 'म कमाउन गएको केटो कलाकार बन्न आइपुगेँ ।'

नेपाल फर्कनुअघि नै उनले कतारमै एउटा म्युजिक भिडियो गरे । त्यो गायक हेमन्त शिशिरको गीतमा थियो । त्यसपछि उनले प्रमोद खरेलको 'बाचा कसम फेरिदियौ' गीतमा गरेको म्युजिक भिडियोले उनलाई यस क्षेत्रमा चिनाइदियो । झट्ट हेर्दा नायक जीवन लुइँटेलजस्ता देखिने सुरेशले आफूलाई सुरेशकै रूपमा चिनाउने सपना बोकेको बताए ।

नेपाल फर्किएपछि उनले स्वरूपराज आचार्यको स्वरमा रहेको गीत 'छुट्यौ भने रुनुपर्ला'मा नीता ढुंगानासँग अभिनय गरे । यसले उनलाई निकै चर्चा दिलायो । 'मैले फर्किएर ठीकै गरेँजस्तो लाग्यो', सुरेशले भने । त्यसपछि प्रमोद खरेलको 'मेरो माया', कृष्ण विश्वकर्मा र कल्पना बीसीको तीज गीत 'रातो साडी'लगायत दर्जन गीतको म्युजिक भिडियोमा अभिनय गरिसकेका छन् ।

कलाकारिता गर्छु भनेर कतारबाट नेपाल फिरेका उनलाई यस क्षेत्रमा पाउन थालेको चर्चा र स्थानले जति हौस्याएको छ, यसको भित्री कथाले भने पिरोल्न थालेको छ । 'कलाकारितामा नाममात्रै रहेछ, दाम त उल्टै खर्चनु पो पर्ने !', उनले भने, 'यसरी त कसरी जिन्दगी चल्छ र ? ' उनले नेपाली कलाकारितामा मेहनत कम रोमान्स बढी देखेका छन् । 'यसले कलाकारिता क्षेत्र माथि उठ्न सक्दैन', सुरेशले भने, 'पुरुष कलाकारले आफैं पैसा हालेर कालकार बन्नुपर्ने बाध्यता छ ।'

नेपाली कलाकारिताले ९० प्रतिशत आफूलाई सुधार्न बाँकी रहेको सुझाव दिने सुरेश भन्छन्, 'कि पैसा खर्चनुपर्ने या त सम्झौता गर्नुपर्ने सोचले क्वालिटीको कलाकारिता कहाँबाट हुन्छ ? ' दीपेश पाण्डेको 'भावना' चलचित्रमा अभिनयका लागि अनुबन्धित भएका सुरेश भन्छन्, 'जीवन सपना र यथार्थबीचको सत्य हो, हेरौं कहाँ पुग्न सकिन्छ ।' यही क्षेत्रमा लाग्ने सपना बोकेर कतारबाट आएकाले केही गरेर देखाउने आँट आफूमा भएको उनले बताए ।