जगद्गुरुले गरे पशुपतिमा महाभिषेक
काठमाडौँः नेपालका प्रथम जगद्गुरु बालसन्त मोहनशरण देवाचार्यले राष्ट्रकल्याण र शान्तिको कामना गर्दै पशुपतिनाथ मन्दिरमा शनिबार बिहान महाभिषेक गरेका छन् ।
महाकालीको कञ्चनपुरस्थित भम्केनीधाममा नेपालका ७५ वटै जिल्लालाई समेटेर ७५ फिट अग्लो नेपाल आमाको मूर्ति बनाउने क्रममा महाकालीदेखि मेचीसम्मको पैदल यात्राको क्रममा काठमाडौं आएका जगद्गुरुले पशुपतिनाथमा विशेषपूजा अन्तर्गतको महाभिषेक गरेका हुन् ।
पशुपतिनाथ मन्दिरको गर्भगृहमा महाभिषेक गर्नुअघि जगद्गुरु बालसन्तले नियमानुसार चण्डेश्वर, बासुकीनाथ, सिद्देश्वर, नारायण, लालगणेश, सूर्यनारायण, श्रीयन्त्र, बागमती, कल्केश्वर, सन्तापहरेश्वर, कीर्तिमुख भैरव, कोटी लिंगेश्वर, उन्मत्त भैरव, सप्तमात्रिका, नवग्रहको दर्शन र पूजाआजा गरेका थिए । नवग्रहपछि मन्दिरको दक्षिणी ढोकाबाट प्रवेश गरेपछि कार्यवाहक मूलभट्ट रामकारान्त भट्टले महाभिषेक गराएका थिए ।
करिब १५ मिनेटको महाभिषेकपछि जगद्गुरुले चारै ढोकाबाट दर्शन गरी सत्यनारायणको पूजा, प्रार्थना, भक्तजनलाई चन्दन, टिका र प्रसाद वितरण गरेपछि अन्त्यमा क्षमा पूजा गरेका थिए ।
महाभिषेकपछि जगद्गुरुले राष्ट्र कल्याण र शान्तिका लागि पशुपतिनाथ मन्दिरमा विशेष पूजा गरेको बताए । उनले अन्नपूर्णसँग भने, ‘विभिन्न कारणले देशमा अशान्ति छाएको छ, आपसमा सद्भाव हराउँदै गएको छ । त्यसैले महाकालीदेखि मेचीसम्मको पैदल यात्राको क्रममा पशुपतिनाथमा समग्र देशमा शान्ति छावोस् र मानवको कल्याण होस् भनेर महाभिषेक गरेको हुँ ।’
जगद्गुरुको समूहको व्यवस्थापनमा रहेका ज्योतिषी वासुदेवकृष्ण शास्त्रीले पञ्चामृत सहितको महाभिषेकका क्रममा भगवान् शंकरको ५१ जना ब्राह्मणद्धारा रुद्राभिषेक पनि गरेको जानकारी दिए । मध्याह्न बत्तीसपुतलीस्थित बैंकेश्वर मन्दिरमा प्रवचन दिएका जगद्गुरुले साँझ पशुपतिनाथपूर्व बागमती नदीकिनारामा हुने आरती गरेका थिए ।
जगद्गुरु काठमाडौं उपत्यका भ्रमण समितिका संयोजक भरत घिमिरेका अनुसार, ३८ औं जिल्ला काठमाडौं प्रवेश गरेपछि जगद्गुरु बालाजु, महादेवटार, सामाखुसी, बुढानीलकण्ठ, शंखपार्क, सिमलटार, आरुबारी, गोकर्ण, उत्तरबाहिनी भएर गौशाला आइपुगेका हुन् । यसपछि जगद्गुरुले तीनकुने, कोटेश्वरस्थित महादेवथान, बालकुमारी, सातदोबाटो, महालक्ष्मीथान, भैसेपाटी, दक्षिणकाली, चोभार, कीर्तिपुर, बल्खु, कलंकी, मातातीर्थ, थानकोट, भीमढुंगा, सीतापाइला हुँदै काठमाडौंका भित्री सहर प्रवेश गर्नेछन् ।