खेमको ‘ठहरै बनायो गाँठे’ सार्वजनिक
काठमाडौँ: पत्रकार खेम रिसालको गीत एल्बम ‘थालनी’ सार्वजनिक भएको छ ।
आइतबार राजधानीमा गीतकार डा. कृष्णहरि बराल, संगीतकार राजु सिंह र गायिका देविका बन्दनाले गीति एल्बम संयुक्त रुपमा सार्वजनिक गरे ।
पत्रकार रिसालको पहिलो गीति एल्बममा गणेश श्रेष्ठको शब्द र मोहन मगरको संगीत रहेको छ ।
रिसालले आइतबार नै ‘थालनी’ एल्बमको ‘ठहरै बनायो गाँठे’को म्युजिक भिडियो समेत सार्वजनिक गरेका छन् । भिडियोमा वर्षा शिवाकोटी, स्वयम् रिसाल र बाल कलाकार प्रान्स तिवारीको अभिनय समेटिएको छ ।
निकेश खड्काको निर्देशनमा तयार भएको भिडियोको सम्पादन निशान घिमिरेले गरेका हुन् ।
एल्बम सार्वजनिक कार्यक्रममा बोल्दै संगीतकार राजु सिंहले खेमका थालनीको प्रशंसा गरे । ‘गीतले नयाँ पुस्ताको प्रतिनिधित्व गरेको छ । जहाँ नेपाली मौलिकता पाइन्छ,’ सिंहले भने ।
त्यस्तै, गीतकार बरालले खेमको थालनी शीर्षकले नै सुरुवात देखाएको बताए । ‘शब्द चयन, श्वर, लय मात्र नभएर म्युजिक भिडियो समेत गीत सुहाउदो बनेको छ’, बरालले भने । कार्यक्रममा गीतकार देवीकाले खेम रिसाललाई सांगीतिक यात्रा सुरु गरेकोमा शुभकामना दिइन ।
प्रतिक्रिया दिनुहोस !
