तीजमा फरक फेसन

तीज, रातो रङको पर्व । महिलाका लागि खुसीको पर्व । दिदीबहिनी भेट भएर रमाइलो गर्ने बेलामा आफूलाई सबैभन्दा राम्री देखाउन कसलाई रहर लाग्दैन र ? यसपालिको तीजमा पनि आफूलाई कसरी फरक देखाउने भनेर सोचिरहनुभएको छ भने एकपटक फेसन ट्रेन्डको बारेमा जानकारी लिनैपर्छ ।

समयअनुसारको पहिरन गर्ने शैली बढेको छ । महिलाहरू सामान्यभन्दा आफूलाई फरक देखाउने डिजाइनर पहिरन लगाउन मन पराउँछन् । बलिउडका फेसन डिजाइनर विशाल कपुरले यसपटक हिप छोप्ने लेन्थका टपसँग लेहंगा डिजाइन गरेका छन् । दरबारमार्गस्थित पनाच रनवेमा लेहंगा खोज्न किशोरी र युवतीहरू बढी आउँछन् ।

पनाच रनवे सञ्चालन गरिरहेकी श्वेता सिरोहिया रोकाका अनुसार यसपालि 'कलरफुल बोर्डर विथ हेभी वर्क' टप लेहंगा चल्तीमा छ ।' उनका अनुसार पेट देखिने गरी लगाइने छोटो ब्लाउज र लेहंगा, सलको फेसन पुरानो भइसक्यो । युवतीको रोजाइमा लेहंगा परे पनि अधबैंसे महिलाको रोजाइमा सारी नै पर्ने गरेको छ । रेडिमेड सारी पनि फेसनमा छ ।

सिमर गोल्ड, लाइक्रा फेब्रिकका सारी लगाउन सजिलो हुन्छ । थोरै तन्किने खालको कपडा भएकाले मोटो मान्छेलाई स्लिम देखाउनुका साथै शरीरमा सपक्क मिल्ने उनको तर्क छ । दुईतीन महिनाअघिको फेसन यति बेला आउट भइसक्यो । अहिले मसिनो 'मिरर वर्क', ह्यान्डवर्क सारी, हेभी ब्लाउज चलनमा छन् ।

'फ्रेन्च लेस सारी विथ बोर्डर' लगाउन सजिलो हुनुका साथै डिसेन्ट देखिने भएकाले धेरैले खोज्छन् । श्वेता भन्छिन्, 'योचाहिँ एभरग्रिन हो, चाडपर्वमा मात्र नभई अरू बेला पनि लगाउन मिल्छ ।' 'र सिल्क विथ हेभी प्योर सिल्क बोर्डर' सारी नयाँ खोज्नेहरूको रोजाइ बन्नसक्छ । कलरफुल हुने भएकाले यसले फेस्टिभ मुड दिन्छ ।

अनारकली कुर्ता हराउँदै गएको छ भने त्यसको ठाउँ अनारकली ड्रेसेजले लिएको छ । लेनिन, कटन र सिल्क, साटन, प्योर सिल्कका अनारकली ड्रेसेज बजारमा भेटिन्छन् । लामो स्ट्रेट कुर्तालाई प्यान्टसँग लगाउन सकिन्छ । रातो रङ सदाबहार नै हो । यसपालि गाढाभन्दा हलुका रङ चलनमा छन् ।

तीज र दसैँका लागि ३५ प्रतिशत विशेष छुट दिइरहेको पनाच रनवेमा आठ हजार रुपैयाँदेखिका अनारकली ड्रेसेज, १५ हजार रुपैयाँदेखिका सारी र २० हजार रुपैयाँदेखिका लेहंगा छन् । वर्ष दिनको तीजमा सबैले झपक्क गहना लगाउन रुचाउँछन् । मसिना गहनाभन्दा हेभी गहना नै यसपालि बढी चलेको देखिन्छ । पहिरनसँग म्याच गरेर नक्कली गहना लगाउने चलन छ ।

डिजाइनर विश्व गौतमको थिममा रातो रङ नै परेको छ । भन्छन्, 'तीजमा रातोबिना अरू रङको कल्पना बेकार हुन्छ ।' गौतमले यसपालि सादा ड्रेस बढी बनाएका छन् । सारी, कुर्ता नरुचाउनेका लागि वेस्टर्न गाउन बेस्ट अप्सन हुन्छ । गौतमका अनुसार किशोरी र युवतीमात्र नभई विवाहित महिलाले पनि गाउन खोजिरहेका छन् ।

लामो, घुँडासम्म पुग्नेदेखि छोटा खालका ड्रेसेज उमेर समूहअनुसार रोजाइमा परेका छन् । घुँडासम्मको लुज फिटिङ ड्रेस लेग्गिङ्समा लगाउन पनि सकिन्छ । रातोबाहेक पहेँलो र गोल्डेन रङ उनको डिजाइनमा परेका छन् । तीज भएकाले यस्ता पहिरनमा पनि हेभी गहना नै लगाउन सकिन्छ । विश्वका अनुसार नेकलाइनमा हेभी वर्क भएको पहिरन भए कानमा मात्र हेभी इयर रिङ लगाउँदा राम्रो देखिन्छ । गला अलि खुला भएको ड्रेसमा घाँटीमा हेभी गहना लगाएर कान खाली राख्न पनि सकिन्छ ।

कुपण्डोलमा जर्दोजी बुटिक चलाइरहेकी नवीना महर्जनले पनि यसपालि सलबिनाको लामो टप र लेहंगा नै बढी बेचिरहेकी छन् । उनको डिजाइनमा रातो र हरियो रङ बढी प्रयोग भएको छ । पहिले केही डिजाइनर लेहंगामात्र बजारमा भेटिन्थे तर अहिले बजारभरि छ्यापछ्याप्ती पाइन थालेपछि धेरैको लेहंगा लगाउने चाहना पूरा भइरहेको छ । बजारमा पाँच हजार रुपैयाँदेखिका लेहंगा पाइन्छन् ।

नेपालीपन झल्किने पहिरन लगाउन चाहनेले ढाकाको कपडा प्रयोग गरेर लेहंगा या सारी बनाउन सक्छन् । आफूले चाहेजस्तो बोर्डर किनेर प्लेन सारीमा आफैं डिजाइन गर्न पनि सकिन्छ ।