तीजमा कसरी गर्ने वाटरप्रुफ मेकअप
तीज गर्मी महिनाको चाड भएकाले यस बेला वाटरप्रुफ मेकअप गर्नुपर्छ । बिहानदेखि बेलुकीसम्म मेकअपमै बस्नुपर्छ । नाचगान धेरै गरिन्छ । यो मौसममा अधिक पसिना आउँछ । हुन त जति नै वाटरप्रुफ मेकअप गरे पनि पसिना पूरै रोकिँदैन तर पनि केही हदसम्म पसिनाबाट जोगिन सकिन्छ । यसका लागि सनब्लक क्रिमदेखि प्रयोग गरिने अरू शृंगारका सामग्री वाटरप्रुफ नै हुनुपर्छ ।
अनुहार सफा गरेपछि पहिला सनब्लक क्रिम लगाउनुपर्छ । अनुहारमा दागहरू छन् भने कन्सिलर लगाएर छोप्नुपर्छ । आँखाको मेकअप पहिला गर्दा राम्रो हुन्छ । यसो गर्दा गालातिर गाजल वा स्याडोहरू खस्यो भने मेट्न सजिलो हुन्छ ।
आँखाको मेकअप गर्दा तीज भएकाले रातो, गोल्डेन र हरियो आइस्याडो बढी प्रयोग गरिन्छ । आफ्नो पहिरनअनुसार छनोट गर्दा राम्रो हुन्छ । सानो आँखालाई ठूलो देखाउने भएकाले स्मोकी आई रोजाइमा बढी परेको हो । यसका लागि कालो आइस्याडो वा गाजल प्रयोग गर्न सकिन्छ । आइब्रो छेउमा हाइलाइट गर्नुपर्छ । अचेल मसिनो गाजल लगाउने चलन छ । कसैलाई आँखाको बीच भागबाट गाजल लगाएको मन पर्छ ।
अहिले बिबी क्रिम चलेको छ । आफ्नो स्किन टोन अनुसारको फाउन्डेसन वा बिबी क्रिम लगाउनुपर्छ । आजकल धेरै साइनिङ मेकअप चल्तीमा छ । ब्रन्जर वा हाइलाइटर पाउडर लगाउनुपर्छ । अहिले सामान्य मेकअपमा पनि हाइलाइटर पाउडर लगाइन्छ । पहिले गुलाबी वा रातो रोज लगाउने चलन थियो तर अहिले ह्वाइट, सिल्भर र गोल्डेन बढी चलाइन्छ । जहाँ हाइलाइट गर्ने हो त्यहाँ हाइलाइटर पाउडर टच गर्नुपर्छ । खासगरी अनुहारको उठेको भागमा यो प्रयोग गरिन्छ ।
कसैको नाक सानो छ भने चुच्चो देखाउन माथितिर हाइलाइट गरी साइडमा डार्क बनाउनुपर्छ । धेरै पसिना आउने अनुहार भए लुज पाउडर प्रयोग गर्नुपर्छ । त्यसपछि लिपस्टिक लगाउनुपर्छ । लिपस्टिक धेरै ग्लसी हुनु हुँदैन । मेकअप गर्दा अनुहारको भागलाई मात्र चिटिक्क पारेर कान, घाँटी वा खुला ब्लाउज लगाउँदा पछाडिको भागमा ओरिजिनल स्किन देखिन्छ । कान, घाँटी र ढाडमा पनि फाउन्डेसन लगाउनुपर्छ ।
चाडपर्वका बेलामा गोल्ड फेसियल नै गरिन्छ । तीजको एक वा दुई दिनअगाडि फेसियल गर्नुपर्छ । पूजा गर्दा पानीको प्रयोग गरिन्छ । नेल पोलिस मेटिनसक्छ । नेल आर्ट गर्दा लामो समय टिक्छ र त्यो अरूभन्दा फरक पनि देखिन्छ ।
कपाल कोर्दा पनि उत्तिकै ध्यान पुर्याउनुपर्छ । हेभी जुरोको साटो सामान्य जुरो बनाएर साइडमा फूलले सजाउँदा राम्रो देखिन्छ ।