अस्पतालमा सर्पले टोकेका बिरामीको चाप
वीरगन्जः वीरगन्जको नारायणी उपक्षेत्रीय अस्पतालमा उपचारका लागि आउने सर्पदंशका बिरामीको संख्या बढेको छ । नारायणी उपक्षेत्रीय अस्पतालमा मात्रै दैनिक सर्पदंशका सातआठजना बिरामी उपचारका लागि आउने गरेका छन् ।
असार महिनायता नारायणी उपक्षेत्रीय अस्पतालमा सर्पदंशका बिरामीको चाप अत्यधिक बढेको अस्पतालको आकस्मिक उपचार कक्षका इन्चार्ज प्रह्लाद साहले बताए । गत असार र साउन गरी दुई महिनामा मात्रै अस्पतालमा सर्पदंशका चार सय ५२ जना बिरामी उपचारका लागि आएको जानकारी साहले दिए ।
उनले भने, ‘दुई महिनामा सर्पदंशका दुई सय ४५ पुरुष र दुई सय सातजना महिला अस्पतालमा उपचारका लागि आएको तथ्यांक छ ।
असार र साउन महिनामा गरी अस्पतालमा आएका सर्पदंशका बिरामीमध्ये ३१ जनाको एन्टी स्नेक भेनम अर्थात् सुई लगाएर उपचार गरिएको जानकारी साहले दिए ।
दुई महिनामा चार सय ५२ जना सर्पदंशका बिरामी उपचारका लागि आए पनि शरीरमा सर्पको विषको असर देखापरेका ३१ जनालाई मात्र सुई लगाएर उपचार गरिएको उनले बताए ।
‘उपचारका लागि अस्पतालमा आउने सर्पदंशका बिरामीलाई सुरुमा केही घन्टा अब्जरभेसनमा राखिन्छ’, उनले भने, ‘अब्जरभेसनका क्रममा शरीरमा विषको असर देखापरे मात्रै सुई लगाएर उपचार गरिन्छ । विषको असर देखा नपरेकालाई भने १२ देखि २४ घन्टापछि घर पठाउने गरेका छौं ।’
नारायणी उपक्षेत्रीय अस्पतालमा पर्सा, बारा, रौतहट, सर्लाही र मकवानपुर जिल्लाबाट सर्पदंशका बिरामी उपचारका लागि आउने गरेका छन् । वीरगन्जमा सर्पदंशका बिरामीको उपचार सेवा नारायणी उपक्षेत्रीय अस्पतालमा मात्र उपलब्ध छ ।
तराईका जिल्लामा बढीजसो करेत र कोब्रा जातिका विषालु सर्पको बिगबिगी छ । नारायणी उपक्षेत्रीय अस्पतालमा एन्टी स्नेक भेनमको अभाव नभएको अस्पतालका प्रवक्ता रमेश चौधरीले बताए ।