साढे चार किलो चरेससहित तीन नेपाली पक्राउ
कञ्चनपुरः पश्चिमी सीमा नाकाको महाकाली नदी माथिको वनवासा पुलमा तीन नेपालीलाई भारतीय सीमा सुरक्षा बल (एसएसबी) ले साढे चार किलो चरेस सहित पक्राउ गरेको छ।
म १ प १६३० नम्बरको मोटरसाइकलमा जाँदै गरेका बेला मंगलबार चरेससहित बाँके, कोहलपुरका ३७ वर्षीया शान्ति बुढाथोकी, ३८ वर्षीय विमल घर्ती मगर र भीमदत्तनगरपालिका खैरभट्टिका २७ वर्षीय लक्ष्मण सुनारलाई पक्राउ गरिएको भारतीय प्रहरीले जनाएको छ।
तीनै जना मोटरसाइकलमा जाँदै गरेका बेला एसएसबीले जाँच गर्दा चरेस फेला परेको भारतीय प्रहरीको भनाइ छ। बुढाथोकीलाई मगरले १० हजार रुपैयाँ दिने गरी चरेस वनवासा पुर्याउन लगाएका थिए।
भीमदत्तनगर बसपार्कबाट मोटरसाइकल चालक सुनारलाई वनवासा पुर्याए बापत पाँच हजार दिने जनाउँदै लगेपछि उनीहरु पक्राउ परेका हुन्। अभियुक्त तीनै जनालाई एसएसबीले भारतीय प्रहरीको जिम्मा लगाएको छ।
जिल्ला प्रहरी कार्यालय कञ्चनपुरका प्रहरी नायब उपरीक्षक नैनसिंह कार्कीले चरेस सहित नेपाली पक्राउ परेको जानकारी हालसम्म पाउन नसकिएको बताए।