अपराधी नउडाउने भन्दै फर्काइदियो इतिहादले
काठमाडौंः गृह मन्त्रालयले निष्कासन (डिपोर्ट) गर्ने निर्णय गरेको एक पाकिस्तानी नागरिकलाई इतिहाद एयरलाइन्सले बोडिङ पास नदिई फर्काइदिएको छ । निष्कासित यात्रुको उडानबारे अध्यागमन विभागले समयमै समन्वय नगरेको भन्दै इतिहादले ती पाकिस्तानीलाई फर्काइदिएको हो ।
विभागले भने सम्बन्धित एयरलाइन्सको टिकट खरिद गरिसकेको अवस्थामा कुनै यात्रुबारेमा जानकारी गराउन जरुरी नभएको दाबी गरेको छ । चोरी मुद्दामा जेल सजाय भोगेका पाकिस्तानी नागरिक राना गणेशबहादुरलाई विभागको सिफारिसमा गृह मन्त्रालयले एक वर्ष अवधिभर नेपाल आउन नपाउने गरी निष्कासन गर्ने निर्णय गरेको थियो । काठमाडौंबाट पाकिस्तानसम्म कुनै एयरलाइन्सको सीधा उडान नभएपछि ती गणेशले काठमाडौंबाट आबुधाबी हुँदै इस्लामाबाद जाने टिकट लिएका थिए ।
इतिहाद एयरलाइन्सले आफूमाथि दुव्र्यवहार गरेको भन्दै गणेश अर्को एयरलाइन्सबाट पाकिस्तान जाने तयारीमा छन् । अध्यागमन विभागका महानिर्देशक केदार न्यौपानेले गणेश निष्कासित भइसकेकाले छिट्टै पठाइने बताए । सोलुखुम्बुकी एक युवतीसँग विवाह गरेका गणेश हिन्दु धर्मावलम्बी हुन् ।
विमानस्थल पुगेका अध्यागमनका कर्मचारीले गणेशलाई उडाइदिन पटकपटक गरेको आग्रहलाई एयरलाइन्सका कर्मचारीले इन्कार गरेको स्रोतले बतायो । राति अबेरसम्म पनि एयरलाइन्सले उडाउन इन्कार गरेपछि अध्यागमनका कर्मचारीले ती पाकिस्तानीलाई विभागमै लगेका थिए । उनी अहिले अध्यागमनको हिरासतमै छन् । गृह मन्त्रालयको निर्णयअनुसार अध्यागमन प्रतिनिधिले पत्र देखाउँदासेमत इतिहादले अटेर गरेर आफूमाथि पर्न खोज्नु लज्जास्पद भएको अध्यागमन अधिकारीको भनाइ छ ।
मन्त्रालयको निर्णयका आधारमा अध्यागमन विभागले पाकिस्तानी नागरिक गणेशलाई विभागका एक कर्मचारीको साथ लगाएर सोमबार साँझ विमानस्थल पठाएको थियो । मन्त्रालयले निष्कासनको निर्णय गरेर पठाइएको यात्रुलाई कुनै एयरलाइन्सले रोक्न नसक्ने विभागका एक कर्मचारीले बताए ।
पाकिस्तानीको यात्राका बारेमा आबुधाबीस्थित इतिहाद एयरलाइन्सको केन्द्रीय कार्यालयबाट स्वीकृति लिनुपर्ने प्रावधान भएकाले उनले उडान भर्न नपाएको इतिहादका एक कर्मचारीले अन्नपूर्णलाई बताए । ‘हामीले निष्कासित विदेशीहरूलाई एउटै प्रक्रियाबाट पठाउने हो । यसअघि पनि गणेशजस्ता धेरैलाई पठाएका छौ’, विभागका एक अधिकारीले भने, ‘अरू एयरलाइन्सले सहजै लैजान्थे, इतिहादले बखेडा झिक्यो ।’
इतिहादका विमानस्थलस्थित कर्मचारीले ती पाकिस्तानीलाई उडान गर्न नसक्ने भन्दै फर्काइदिएको छ । उक्त एयरलाइन्सले निष्कासित गणेशको यात्राका बारेमा आफूहरूलाई २४ घन्टाअगाडि जानकारी नगराएको भन्दै बोडिङ पास दिन इन्कार गरेको हो । तर ती यात्रुले दुई दिनअघि नै इतिहाद एयरलाइन्सको टिकट लिएका थिए । टिकट लिने बेलामा समेत अध्यागमनका कर्मचारीले ती पाकिस्तानी निष्कासन गर्न लागिएका व्यक्ति भएको जानकारी गराएको थियो ।
विभागले ती पाकिस्तानीलाई निष्कासन गरेको पत्र र इतिहाद एयरलाइन्सको टिकटसहित एक कर्मचारीको साथ लगाएर विमानस्थल पठाएको थियो । इतिहादले टिकट लिएर उडानका लागि गएका व्यक्तिलाई फर्काएर अध्यागमनका कर्मचारी र स्वयं यात्रुलाई समेत मानसिक तनाव दिएको छ ।
केही समयअघि पनि इतिहाद एयरलाइन्सले साउदी अरेबियाका अब्दुल अलीलाई बोडिङ पास नदिई विमानस्थलबाट फिर्ता पठाएको थियो ।