मानव तस्करीको नयाँ गन्तव्य बन्दै कीर्गिस्तान

नेपालगन्जः  नेपालगन्ज  तथा आसपासका नाका हुँदै  कीर्गिस्थानसम्म मानव तस्करी हुन थालेको छ । माइती नेपाल नेपालगन्ज संयोजक केशव कोइरालाले पछिल्लो समयमा किर्गीस्तानमा  मानव तस्करीको नयाँ गन्तव्य  हुन थालेको बताए । 

जनवरीयता भारत हुँदै अवैध रुपमा कीर्गिस्थानजान लागेका १६ महिलालाई नेपालगन्ज नाकाबाट रोकिएको संयोजक कोइरालाले बताए । दाङ, सिन्धुपाल्चोक, नवलपरासी  जिल्लाबाट ल्याएर नेपालगन्ज नाका हुँदै कीर्गिस्थानलगिएको थियो । 

अन्य खाडी मुलकमा भन्दा राम्रो आम्दानी हुन्छ भनेर उनीहरुलाई कीर्गिस्थानलगिदै गरेको अवस्था प्रहरीको सहयोगमा  नाकामा रोकिएको  संयोजक कोइरालाले बताए ।
मानव तस्करी सम्लग्नले भारतको बाटो हुँदै कीर्गिस्थानलाने गरेको भेटिएको उनले बताए । भारतमा भिसा बनाएर उनीहरुलाई कीर्गिस्थानलाने तयारी गरिएको अवस्था रोकिएको  हो। नेपालगन्ज नाका हुदै अवैध रुपमा खाडि मुलकमा मानव तस्करी गर्दै आएका छन् ।

डेढ वर्षअघि कीर्गिस्थानपुर्याइएकी  एक किशोरीलाई माइती नेपालले उद्धार गरेको  संयोजक कोइरालाले जानकारी दिए । सिरिया पुर्याएकी अर्की महिलाको समेत उद्धार गरिएको छ ।

संयोजक कोइरालाका अनुसार  २०७२ भाद्र २० यता जोखिमपूर्ण यात्रामा रही नेपालगन्ज नाकाबाट उद्धार गरि आवधिक गृहमा प्रवेश गराइएको संख्या आठ सय ५०  रहेको छन् । आठ सय ७३ जनालाई मानब बेचबिखन र सरक्षित बसाइँ सराई बारे जानकारी दिई पारिवारिक पुर्नरमिलन गराइएको  छ ।  यस्तै, २६ जना श्रम र यौन शोषणमा परेकाको उद्धार गरिएको  छ । पाँच सय १० जनालाई बोर्डरबाट परामर्श दिई घर फिर्ता  गराएको कोइरालाले बताए ।

माइती नेपाल नेपालगन्जमा ६ सय २५ जनाको खोजतलासको निवेदन परेको छ । जस मध्ये ८६ जना फेला परेका छन् । वैदेशिक रोजगारी गएका ३० जना घरेलु हिंसा परेको निवेदन आएको कोइरालाले बताए ।

बेचबिखनका घटना धेरै हुने गरेको भएमा बाँके जिल्ला अदालतमा ३ वटा मुद्दा मात्रै एक बर्षको अवधिमा दर्ता भएका छन् ।

यो बर्ष वैदेशिक रोजगारीको क्रममा २ जना महिलामाथि जबरजस्ती करणी भएको निवेदन समेत माइती नेपाल नेपालगन्जमा परेको छ । रोजगारी, उपचार, शिक्षा र भ्रमणकोे नाममा प्रलोभनमा पारेर दलालले नेपाली महिलालाई बेचविखन गरिरहेको बाँकेका प्रमुख जिल्ला अधिकारी रबिलाल पन्थले बताए ।

उनले खुला सीमानाका कारण भारत हुँदै खाडी मुलुकसम्म मानव तस्करी भइरहेको बताए । उनले मानव तस्करी र  बेचबिखन नेपाल र भारत दुवै देशको साझा समस्या भएकाले संयुक्त रुपमा लाग्नु पर्ने कुरामा जोड दिए ।

बाँकेका प्रमुख जिल्ला अधिकारी पन्थले अवैध रुपमा मानव तस्करी रोक्न सीमामा कडाई गरिएको बताए । उनले सीमामा कडाई गरिएपनि खुला नाका भएकाले पूर्ण रुप रोक्न भने नसकिएको स्वीकार गरेका छन् ।