गंगामाया बचाउ अभियान अन्तर्राष्ट्रिय अदालतमा जाने
काठमाडौं: गङ्गामाया बचाउ अभियानले आरोपी छविलाल पौडेललाई तत्काल प्रक्राउ गरी कारबाही प्रक्रिया अगाडि नबढाए अन्तर्राष्ट्रिय फौजदारी अदालतमा जाने बताएको छ।
छोरा कृष्णप्रसाद अधिकारीको हत्यारालाई कारबाहीको माग गर्दै गङ्गामाया अधिकारी ३२ दिनदेखि वीर अस्पतालमा आमरण अनशनमा छिन्। अधिकारीको अवस्था गम्भीर बन्दै गएको भन्दै अभियानले मंगलबार पत्रकार सम्मलेन गर्दै उनको जीवन रक्षाका लागि सरकारले मुख्य आरोपी पौडेललाई तत्काल पक्राउ गर्नुपर्ने माग राखेको छ।
अभियानकर्ता ओमप्रकाश अर्यालले सर्वोच्च अदालतले समेत हत्याका मुख्य आरोपीलाई तत्काल पक्राउ गर्न आदेश दिएको उल्लेख गर्दै राष्ट्रिय कानुनबमोजिम कारबाही नगरे आफूहरु अन्तर्राष्ट्रिय कानुनबमोजिम अघि बढ्ने चेतावनी दिए।
अभियानकर्ता प्रा कपिल श्रेष्ठले चितवन जिल्ला अदालतले अस्पतालमै आएर बयान लिने भने पनि अधिकारी बोल्न नसक्ने अवस्थामा रहेको जनाउँदै तत्काल सरकारलाई यसप्रति गम्भीर हुन आग्रह गरे।
अभियानकर्ता दिनेश त्रिपाठी, कपिल श्रेष्ठ, सुबोध प्याकुरेल, शर्मिला कार्की, रसना ढकाल, आशिकराम कार्की र पुप्प पौडेललगायतले गङ्गामायालाई न्याय दिएन भने आफूहरु प्रधानमन्त्री पुष्पकमल दाहाल राष्ट्र सङ्घको बैठकमा भाग लिन जानुअघि नै अधिकारीलाई न्याय दिलाउन राष्ट्र सङ्घसमक्ष र महासचिव वान की मुनलाई समेत आग्रह गर्ने बताए।
डा केदारनरसिंह केसीले आफूलाई बचाएर मात्रै आफ्नो अधिकारका लागि लड्न सकिने भन्दै अधिकारीलाई तत्काल अनशन तोड्न आग्रह गरे। केसीले भने,'तपाईका साथमा हामी छाैं, अनशन तोडेर आउनुहोस्, अनि न्यायका लागि सँगै लडौं।'
प्रतिक्रिया दिनुहोस !
