रहनेन् प्रश्न सोध्ने गायक
‘गोरेटो अनि उस्तै छ गल्ली
कतै तिमी बदलियौ कि ?’
यसरी प्रश्न गर्ने गायक एवं संगीतकार सुनील बर्देवा अब रहेनन् । कलेजोको समस्याले उनलाई हामीबाट सधैंको लागि लिएर गयो । बुधबार साँझ उपचारकै क्रममा त्रिवि शिक्षण अस्पतालमा उनको निधन भएको हो । एक्कासि रगत बान्ता गरेपछि उनलाई अस्पताल पुर्याइएका थिए ।
मेट्रिक्सनामक ब्यान्डबाट गाउन सुरु गरेका बर्देवा मूलतः संगीतकार हुन् । पचासको दशकमा उदाएका धेरैजसो प्रख्यात पपगायकका गीतहरूमा उनले संगीत दिएका छन् । नवीन के. भट्टराई, योगेशराज अमात्य, नीमा रुम्बालगायतका धेरै गायकका गीतहरू उनको संगीतले सजिएका छन् । गितारिस्टको रूपमा उदाएका बर्देवाको गायनमा पनि रुचि थियो । साथीभाइको प्रोत्साहनमा उनले गीत गाउन सुरु गरेका थिए ।
पचासको दशकका धेरै पपगायकहरूको गीत उनले कम्पोज गरेका छन् । ‘गोरेटो अनि उस्तै छ गल्ली’, ‘आजभोलि’, ‘बिहानीमा’, ‘पर्खाइमा’ लगायतका गीतहरू उनको आवाजले सजिएका चर्चित गीत हुन् । ‘जब म’, ‘मेरो गितार’, ‘बेस्ट अफ सुनील बर्देवा’लगायतका उनका एल्बम प्रकाशित छन् ।
एक छोरा र एक छोरी रहेका बर्देवाकी श्रीमतीको दुई वर्षअगाडि निधन भएको थियो । बर्देवाको बुधबार नै अन्त्येष्टि गरिएको छ । अन्त्येष्टीपूर्व उनको पार्थिव शरीर नेपाल प्रज्ञा प्रतिष्ठानमा अन्तिम श्रद्धाञ्जलिको लागि राखिएको थियो ।
प्रतिक्रिया दिनुहोस !
