काठमाडौं: प्रधानमन्त्री पुष्पकमल दाहाललाई भारतमा राजकीय सम्मान दिइएको छ । भारत भ्रमणका क्रममा दिल्लीमा रहेका प्रधानमन्त्रीलाई शुक्रबार बिहान गार्ड अफ अनर प्रदान गरिएको हो । प्रधानमन्त्री दाहाललाई भारतीय प्रधानमन्त्री नरेन्द्र मोदीले स्वागत गरेका छन् ।
चार दिने भ्रमणका क्रममा बिहीबार दिल्ली पुगेका प्रचण्डले आजै भारतीय प्रधानमन्त्री नरेन्द्र मोदी तथा राष्ट्रपति प्रणव मुखर्जीसँग भेटवार्ता गर्नेछन् ।
स्थानीय समय अनुसार बिहान ९ बजे माहात्मा गान्धीको समाधिस्थल पुगेर प्रधानमन्त्रीले गान्धीप्रति श्रद्धाञ्जली अर्पण गरेका छन् ।
भारतीय प्रधानमन्त्री नरेन्द्र मोदीसँग वार्ता गर्नु एक दिनअघि नेपाली दूतावास नयाँदिल्लीद्वारा आयोजित रात्रिभोजमा प्रधानमन्त्री दाहालले नेपाल र भारतबीचको सम्बन्ध मजबुत रहेको समेत बताए ।
'नेपाल र भारत राम्रो सम्बन्ध भएका बेलाका मात्र मित्र होइनन् । चाहिएको बेला मद्दत गर्ने मित्र हुन्', भारतीय विभिन्न दलका नेता, पूर्वकूटनीतिज्ञ र सञ्चारकर्मीमाझ उनले भने, 'सदीयौंदेखिको हामीबीचको सम्बन्ध समानता र संस्कृतिका हिसाबले निकट रहँदै आएको छ ।' दाहालले नेपाल र भारतका जनताको साझा भाग्य एकअर्कामा मिसिएको बताए ।
प्रतिक्रिया दिनुहोस !
