महिला व्यवसायीलाई युनिलिभरको लगानी
काठमाडौः मध्यपश्चिम र सुदूरपश्चिम विकास क्षेत्रमा उच्च सम्भावना भएका सयजना साना उद्यमी तयार पार्न र्याप थ्री कनेक्ट, युनिलिभर नेपाल र प्रभु बैंकको संयुक्त लगानीमा कार्यक्रम सञ्चालन गरिने भएको छ ।
हालसम्म पनि व्यवसायीकरणमा महिलाको न्यून प्रतिनिधित्व छ । त्यसलाई बढाउने उद्देश्यका साथ ‘संयोजन’ ले यस्तो कार्य गर्न लागेको हो । यो संस्था यूके एडको अनुदानमा सञ्चालित ग्रामीण पहुँच कार्यक्रमको एउटा शाखा हो । यसले यूनिलिभर नेपाल र प्रभु बैंकको संयुक्त साझेदारीमा काम गर्नेछ ।
यूनिलिभर नेपालले महिला उद्यमशीलता प्रवद्र्धनका लागि ‘हाम्री दिदी’ कार्यक्रम पनि सञ्चालन गरेको छ । यस कार्यक्रमअन्तर्गत ग्रामीण क्षेत्रका विपन्न वर्गका महिलालाई उद्यमशीलता, स्वास्थ्य, सरसफाइसम्बन्धी तालिम तथा परामर्श दिई उनीहरूलाई दिगो आयआर्जनको अवसरका साथै समुदायमा स्वास्थ्य र सरसफाइसम्बन्धी जनचेतना प्रवाह गर्ने जिम्मेवारीसहित परिचालन गरिने कम्पनीले जनाएको छ ।
अछाम, बाजुरा, दैलेख, डोटी र जुम्लाबाट छनोट भएका सयजना महिलालाई काठमाडौंमा कार्यक्रम आयोजना गरी आवश्यक तालिम तथा परामर्श प्रदान गरिसकेको कम्पनीले जनाएको छ ।
नेपाल राष्ट्र बैंकका गभर्नर चिरञ्जीवी नेपालले सोमबार आयोजित कार्यक्रम समापनमा उनीहरूलाई प्रमाणपत्र वितरण गरे । नेपालले युनिलिभर, प्रभु बैंक तथा र्याप थ्री कनेक्टको साझेदारीमा महिला सशक्तीकरण अभियान धेरै महत्वपूर्ण भएको बताए । यसका लागि प्रभु बैंकले प्रतिमहिला १५ हजार रुपैयाँ ऋण उपलब्ध गराउने भएको छ ।
प्रतिक्रिया दिनुहोस !
