बहुलवादी समाजको महत्व बुझाउँदै बाबुराम
काठमाडौँः नयाँ शक्ति पार्टी नेपालका संयोजक डा बाबुराम भट्टराईले राष्ट्रको विकास तथा समृद्धिका लागि मुलुकमा बसोबास गर्ने सबै जातजाति र समुदायको समानुपातिक समावेशी सहभागिता गराउनुपर्ने बताएका छन् ।
तामाङ राष्ट्रिय परिषद्को प्रथम राष्ट्रिय भेलालाई शुक्रबार सम्बोधन गर्दै उनले नेपालमा धेरै जातजाति तथा समुदाय बसोबास गर्ने भएकाले यहाँ बहुलवादी समाजको महत्व रहेको बताए ।
संयोजक भट्टराईले सम्पूर्ण जातजातिको संस्कृतिको संरक्षणका साथै उनीहरुको अधिकार स्थापित गर्न आफ्नो पार्टी क्रियाशील रहेको बताए । ‘खस आर्य, मधेसी, आदिवासी जनजाति तथा दलितलाई निश्चित प्रतिशतको कलस्टरमा राख्नुपर्छ,’ भट्टराईले भने ।
पार्टीका उपसंयोजक रामचन्द्र झा, नेता देवेन्द्र पौडेललगायतले आधुनिक नेपालको निर्माणमा तामाङ जातिको महत्व र योगदान रहेको चर्चा गरे ।
भेलाका संयोजक सुवास तामाङले सङ्गठन सुधार गरी महाधिवेशन गर्नका लागि भेला बोलाइएको जानकारी दिए ।
विसं २०६८ को राष्ट्रिय जनगणनाअनुसार नेपालमा करिब छ प्रतिशत तामाङ जनसङ्ख्या छ । भेलामा देशभरबाट करिब ३०० प्रतिनिधि सहभागी छन् ।
प्रतिक्रिया दिनुहोस !
