काठमाडौं: संयुक्त लोकतान्त्रिक मधेसी मोर्चाले छठसम्म आफ्ना माग पूरा नभए सशक्त मधेस आन्दोलनको चेतावनी दिएको छ । प्रधानमन्त्री पुष्पकमल दाहाल तथा कांग्रेसका सभापति शेरबहादुर देउवासँगको अनौपचारिक भेटमा मोर्चाका नेताहरूले आन्दोलनले सरकारको समीकरणमै परिवर्तन ल्याउने चेतावनी पनि दिएका छन् ।
मोर्चाका नेताहरूले प्रधानमन्त्री दाहाल र कांग्रेस सभापति देउवासँगका औपचारिक/अनौपचारिक बैठकमा साउन १९ मा भएको तीनबुँदे सहमतिअनुसार संविधान संशोधन प्रस्ताव सरकारले दर्ता नगरेको भन्दै आक्रोश पोखेका थिए ।
मोर्चाका नेता संघीय समाजवादी फोरम नेपालका अध्यक्ष उपेन्द्र यादव बेलायतमा रहेकाले संशोधन प्रस्ताव दर्ता गर्ने विषयमा निर्णय गर्न नसकिएको तर्क सत्ता पक्षको छ भने मधेसी नेताहरूले उपप्रधानमन्त्री एवं गृहमन्त्री विमलेन्द्र निधिले प्रधानमन्त्री दाहालको निर्देशनअनुसार काम नगरेको आरोप लगाएका छन् ।
आफूहरूसँगको पटकपटकको बैठकमा प्रधानमन्त्री दाहालले दसैंअघि संशोधन प्रस्ताव दर्ता गर्न निधिलाई निर्देशन दिए पनि उनले दाहालको निर्देशन पालना नगरेको गुनासो मधेसी नेताको छ ।
दसैंसम्म संविधान संशोधन नभए मधेस केन्द्रित दलको भाबी रणनीति के हुने भनी सोधिएको प्रश्नमा मोर्चाका नेताहरूले भने, 'छठसम्म हेरौं, छठ पछि देखाइदिन्छौं ।'
'अबको आन्दोलनको स्वरूप नाकाबन्दी होइन । त्योभन्दा माथिल्लो स्तरको हुनेछ', मोर्चाका नेताहरूले भने ।
एकजना वरिष्ठ मन्त्रीले भने, 'फोरम अध्यक्ष यादव स्वदेश आउनासाथ संविधान संशोधन हुन्छ ।'
तराईमधेस सद्भावना पार्टीका नेता रामनरेश रायले संशोधनका नाममा आफूहरूलाई सत्ता पक्षले खेलाउन खोजको आरोप लगाए । उनले भने, 'हामी छठसम्म धैर्य गर्छौं । त्यसपछि नाकाबन्दी भन्दा कडा आन्दोलन हुनेछ । आन्दोलनले सत्ता समीकरणसमेत परिवर्तन हुन सक्छ ।'
सद्भावना पार्टीका महामन्त्री मनीषकुमार सुमनले संविधान संशोधन नर्दा मोर्चासँग तीनबुँदे सहमति गर्ने सत्तालाई नै घाटा हुने बताउँछन् ।
तमलोपा र सद्भावना चाँडै एकीकरण
तराईमधेस लोकतान्त्रिक पार्टी तथा सद्भावना पार्टी एकीकरण गर्न सैद्धान्तिक सहमति भएको छ । सैद्धान्तिक सहमतिलाई कार्यान्वयन गर्न तमलोपाका उपाध्यक्ष वृषेशचन्द्रलाल कर्ण र सद्भावनाका सहअध्यक्ष लक्ष्मणलाल कर्ण रहेको विशेष कार्यदल गठन गरिएको छ ।
तमलोपा अध्यक्ष महन्थ ठाकुर र सद्भावना अध्यक्ष राजेन्द्र महतोबीच भएको सहमतिअनुसार उनीहरूका कर्णद्वयले केन्द्रदेखि इलाकासम्मको एकताका लागि खाका तयार गरेका छन् ।
एकीकरणका लागि माओवादी केन्द्रको नीति अख्तियार गर्र्दै जो जहाँ छ, त्यही राख्न आआफ्नो पार्टीमा प्रस्ताव राखेका छन् । 'छठलाई केन्द्र बिन्दु बनाएर एकता प्रयास भएको छ', ती नेताले भने ।
प्रतिक्रिया दिनुहोस !
