ट्रिपरले ठक्कर दिँदा नारायणमान बिजुक्छेकी भाइबुहारीको ज्यान गयो
भक्तपुरः काठमाडौं ६ लेन सडकको मध्यपुर थिमी नपा १६ लोकन्थलीमा ट्रिपरले ठक्कर दिँदा बिहीबार दिउँसो नेपाल मजदुर किसान पार्टीका अध्यक्ष नारायणमान बिजुक्छेकी भाइबुहारीको ज्यान गएको छ ।
काठमाडौंबाट भक्तपुर आउँदै गरेको बा ४ ख ३०२० नम्बरको ट्रिपरले आफूभन्दा अघि गुडिरहेको बा ३४ प ६३१२ नम्बरको मोटरसाइकललाई ठक्कर दिँदा मोटरसाइकलको पछाडि बसेकी उनको ज्यान गएको हो ।
महानगरीय प्रहरी वृत्त ठिमीका अनुसार ट्रिपरको ठक्करलगत्तै लडेकी भक्तपुर नपा ५ देकोचा बस्ने वर्ष ४९ की इन्दिरा बिजुक्छेको घटनास्थलमै ज्यान गएको हो ।
वृत्तका प्रमुख प्रहरी नायब उपरीक्षक श्यामबाबु ओलियाले ठक्करबाट मोटरसाइकल चालक एवं मृतकका श्रीमान ५५ वर्षीय राजामान बिजुक्छे घाइते भएको जानकारी दिए ।
उनका अनुसार घाइते मोटरसाइकल चालक राजामान र मृतक इन्दिरा नेपाल मजदुर किसान पार्टीका अध्यक्ष नारायणमान बिजुक्छेकी आफ्नै भाइ र भाइबुहारी हुन् ।
ठक्करबाट इन्दिराको ज्यान गएपछि ट्रिपरका चालक भने फरार भएका थिए । सडकमै ट्रिपर छाडेर चालक भागेपछि आक्रोशित स्थानीय बासिन्दाले त्यसमा तोडफोड गरेका थिए । त्यसलगत्तै प्रहरीले ट्रिपरलाई ठिमी वृत्त ल्याएको छ ।
प्रनाउ ओलियाका अनुसार दुर्घटनामा परी ज्यान गएकी इन्दिराको शव मध्यपुर थिमिको गट्ठाघरस्थित नागरिक सामुदायिक अस्पताल लगिएको थियो । शवको सल्यपरीक्षणको लागि नागरिकबाट काठमाडौं महाराजगञ्जस्थित त्रिवि शिक्षण अस्पताल लगिएको प्रनाउ ओलियाले जानकारी दिए ।
त्यस्तै घाइते मोटरसाइकल चालक राजामानको स्थानीय मेडिकलपछि नागरिक अस्पतालमा उपचार गरिएको थियो ।
दुर्घटना गरी फरार ट्रिपरका चालकलाई महानगरीय प्रहरी वृत्त ठिमीको प्रहरीले काठमाडौंको कोटेश्वरबाट नियन्त्रणमा लिएको छ । रामेछाप जिल्ला मन्थली नपा ९ घर भई हाल काभ्रे भकुन्डेवेशी बस्दै आएका २५ वर्षीय शिवबहादुर भुजेललाई प्रहरीले नियन्त्रणमा लिएर ठिमी वृत्त ल्याएको छ ।
घटनाबारे थप अनुसन्धान भइरहेको ठिमी वृत्तले जनाएको छ ।