दाउराले पिठ्यूँमा हिर्काएर आमाले ६ वर्षीया छोरीको हत्या गरिन्
रोल्पाः दसैंको टीकाको दिन राती रोल्पामा आमाले आफ्नै छोरीको हत्या गरेकिछिन् । लिबाङ नगरपालिका २ खुमेलकी २९ बर्षीया धना वुढाथोकीले ६ वर्षीया छोरी झकमा बुढाथोकीको हत्या गरेको आरोपमा प्रहरीले पक्राउ गरेको छ ।
जिल्ला प्रहरी कार्यालयका प्रवक्ता एवम् प्रहरी निरीक्षक केशव बस्नेतका अनुसार छोरीको हत्याको सूचनाका आधारमा धनालाई बुधबार विहान पक्राउ गरिएको हो । मंगलबार राती नौ बजे छोरीलाई दाउराले पिठ्यूमा हिर्काएपछि बेहोस भएकी थिइन । छिमेकी खुम्बबहादुर बुढाले घटनाको सूचना दिएपछि प्रहरी घटना स्थल पुगेको थियो ।
इलाका प्रहरी कार्यालय सुलिचौरका इन्चार्ज प्रहरी निरीक्षक शशीधर अधिकारीको नेतृत्वमा प्रहरी घटनास्थल पुग्दा बालिका मृत अवस्थामा फेला परेकि थिइन् । प्रहरीको प्रारम्भिक अनुसन्धानमा आमाले छोरीको हत्या गरेको खुलेको भन्दै आमालाई प्रहरीले नियन्त्रणमा लिएको हो । गाउँलेले आमाको मानसिक सन्तुलन ठिक नभएको प्रहरीलाई जनाएका छन् ।
माइतीघरमा बस्दै आएकी धनाको पती भने विदेश छन् । दशैं विदा भएकाले कार्यालय संचालन हुने शुक्रबार घटनाबारे अदालतमा मुद्दा दायर गर्ने गरी अनुसन्धान भइरहेको प्रहरीले जनाएको छ । शवको पोष्टमार्टमका लागि अस्पताल लगिएको छ ।
एक अर्को घटनामा ढुंगा प्रहार हुँदा थबाङकी एक महिला गम्भीर घाइते भएकी छिन् । थबाङ ८ कि ३८ बर्षीया सुनाकुमारी नेपालीको टाउको र बाँया कानको कन्चटमा गम्भीर चोट लागेर गएराती साढे बाह्र बजेदेखि बेहोस छिन् ।
थबाङ स्थित इलाका प्रहरी कार्यालयमा उनका पति धु्रब नेपालीले अपरिचित व्यक्तिले आफ्नो पत्नीलाई ढुंगा प्रहार गरी घाइते बनाएको सूचना दिए ।
सुनाकुमारीको स्थानीय सामुदायि अस्पतालमा उपचार भइरहेको छ । चोट लागेको घाउँमा २७ टाँका लगाइएको छ । उनको होस अभैm खुलेको छैन् । घटनामा पतिको संलग्नतको आशंकामा थबाङ स्थित प्रहरीले पति धु्रबलाई नियन्त्रणमा लिई सोधपुछ गरिरहेको छ ।
घटनाबारे थप अनुसन्धानका लागि बुधबार विहानै इलाका प्रहरी कार्यालय घर्तीगाउँबाट प्रहरी निरिक्षक राजिव श्रेष्ठको नेतृत्वमा प्रहरी थबाङ पुगेकोे जिल्ला प्रहरी कार्यालयले जनाएको छ ।
प्रतिक्रिया दिनुहोस !
