कट्टरपन्थी नेतालाई फाँसी
ढाकाः बंगलादेशमा प्रतिबन्धित कट्टरपन्थी समूहका वरिष्ठ नेता असदुल इस्लामलाई सन् २००५ मा बम आक्रमण गराएको आरोपमा आइतबार फाँसी दिइएको छ । उक्त आक्रमणमा दुईजना न्यायाधीशसहित एक हिन्दु धर्मावलम्बी मारिएका थिए ।
आरिफ नामले चिनिने उनी जमातुल मुजाहिद्दिन बंगलादेश (जेएमबी) का नेता थिए । सर्वोच्च अदालतको आदेश पालना गर्दै उनलाई स्थानीय समयअनुसार आइतबार राति १०ः३० मा खुलना जेलमा फाँसी दिइएको थियो ।
जेएमबीका संस्थापक शायख अब्दुर रहमान एवं आरिफसहित ६ जना वरिष्ठ नेतालाई सन् २००९ मा फाँसीको सजाय सुनाइएको थियो । एक मिनीबसमा जेएमबीले गराएको विस्फोटमा न्यायाधीशद्वय जगन्नाथ पारे एवं सोहेल अहमद मारिएका थिए ।
आरिफबाहेक अरू सबै दोषीलाई सन् २००७ को मार्चमा फाँसी दिइएको थियो । आरिफ भने फरार भएकाले त्यतिखेर बचेका थिए । बंगलादेशको प्रहरीले सन् २००७ को जुलाईमा उनी गिरफ्तार भएका थिए । आफू निर्दोष रहेको भन्दै उनले सर्वोच्च अदालतमा पुनरावेदन गरेका थिए ।
ढाकामा गत जुलाई १ तारिखमा रेस्टुराँमा भएको आतंकवादी आक्रमणमा जेएमबीलाई जिम्मेवार ठहर्याइएको थियो । विदेशी पर्यटक जाने गरेको उक्त रेस्टुराँ आक्रमणमा २२ जना मारिएका थिए । रेस्टुराँमा नृशंस आक्रमण भएपछि बंगलादेशमा जेएमबीप्रति सबै आक्रामक बनेका थिए ।
विभिन्न क्षेत्रबाट उक्त संगठनलाई कडा कारबाही गरिनुपर्ने माग उठेका थिए । बंगलादेशको अदालतले पनि आरिफको पुनरावेदन अस्वीकार गरिदिएको थियो । प्रधानन्यायाधीशले आरिफलाई यसअघिकै आदेशअनुसार कारबाही गर्न मिल्ने निर्णय सुनाएका थिए ।
जेएमबीको स्थापना सन् १९९० मा भएको थियो । बंगलादेशमा सरिया कानुन लागू हुनुपर्ने माग राखी जेएमबीका कार्यकर्ताले आक्रमण गर्दै आएका छन् ।
प्रतिक्रिया दिनुहोस !
