विस्थापितले राहत पाएनन् 

बझाङः मालुमेला ८ आमबगरमा ६ महिनाअघि सडक खन्दा आएको पहिरोका कारण विस्थापित परिवारले अहिलेसम्म कुनै राहत पाएका छैनन् । जडार–कोइरालकोट सडक खन्ने क्रममा आएको पहिरोले घरखेत बगाएपछि बिचल्लीमा परेका यहा“का ७ परिवारले अहिलेसम्म त्रिपालसम्म नपाएको र सडक डिभिजन कार्यालयले क्षतिपूर्ति दिने भने पनि ६ महिनासम्म कुनै सुनुवाइ नगरेको स्थानीय मनीषा दमाईले बताए ।

सडक खन्ने क्रममा गाउँमाथिबाट आएको पहिरोका कारण २५ परिवार रहेको यो गाउँ नै जोखिममा रहेको खबर सार्वजनिकपछि खाद्य अधिकारको क्षेत्रमा काम गर्ने संस्था फियान नेपालका अध्यक्ष अम्मरबहादुर ऐर र कार्यक्रम निर्देशक अशोकबहादुर सिहं, जिल्ला खाद्य अधिकार सदस्यसहित स्थानीय सत्तचारकर्मीको टोली स्थलगत अवलोकन गरेको थियो ।

टोलीसँग पीडित विश्वराज जोशीले सरकारी तहबाटै आफूहरूको उठिवास भएको बताए । उनले नेताको स्वार्थका कारण सडक काट्ने काम सुरु भएको बताउँदै जिल्ला प्रशासन कार्यालयले पनि बेवास्ता गरेको गुनासो गरे ।

पीडित परिवारमध्ये २ परिवार दलित र अन्य गैरदलित छन । गैरदलितको भन्दा विस्थापित दलित परिवारको अवस्था नाजुक रहेको अध्ययन टोलीले जानकारी दियो । ‘गैरदलितले दिएको खलोले पेट पालिरहेका दलित परिवार सबैभन्दा बढी जोखिममा छन्', फियान नेपालका कार्यक्रम निर्देशकसिंहले भने, ‘धेरैजसो गैरदलितको खेत पनि पहिरोले बगाएपछि उनीहरूलाई झन् समस्या भएको छ ।'

राज्यकै निकायबाट निर्माण भएको सडकका कारण गाउँ नै विस्थापित हुदा“ पनि कुनै राहत र क्षतिपूर्ति नदिनु अन्याय भएको फियान नेपालका अध्यक्ष ऐरले बताए । उनले पीडितलाई क्षतिपूर्ति र राहत दिन आफूले केन्द्रीयस्तरमा पहल गर्ने बताए ।

पहिरोका कारण यस गाउँका ७ परिवारको घर पूर्ण रूपमा भत्किएको, खानेपानी, सिँचाइ आयोजनामा पूर्ण रूपमा क्षति भएको र २५ परिवारको करिब ४० रोपनी खेत पुरिएको छ ।
पीडितको दबाबपछि सडक डिभिजन कार्यालय बैतडीले यहाँ भएको क्षतिको विवरण संकलन गरेको भए पनि राहत र क्षतिपूर्ति दिने सवालमा प्रक्रिया अगाडि नबढाउँदा आफूहरूको दैनिकी कष्टकर हुँदै गएको पीडित बलराम भण्डारीले बताए ।