कक्षा दसको परीक्षा पनिकाले नै लिने
काठमाडौः कक्षा दसको अन्त्यमा लिइने परीक्षा यस वर्ष परीक्षा नियन्त्रण कार्यालयले नै सञ्चालन गर्ने भएको छ । पनिकाले परीक्षा सञ्चालनका लागि आवश्यक तयारी सुरु गरेको छ ।
शिक्षा ऐन संशोधनसँगै गठन भएको राष्ट्रिय परीक्षा बोर्डअन्तर्गतको क्षेत्रीय कार्यालयले यस्तो परीक्षा लिने बताइएको थियो । तर बोर्डको केन्द्रीय संरचनाले नै पूर्णता नपाएको तथा क्षेत्रीय कार्यालय स्थापना हुन नसकेकाले यस वर्षका लागि कक्षा दसको परीक्षासम्बन्धी सम्पूर्ण जिम्मेवारी पनिकालाई दिइएको हो । पनिकाले परीक्षा सञ्चालनका लागि आवश्यक तयारी सुरु गरिसकेको छ ।
परीक्षा नियन्त्रक अम्बिकाप्रसाद रेग्मीले बोर्डले दिएको अधिकार प्रयोग गरी यस वर्ष कक्षा दसको परीक्षाका लागि आवेदन फाराम र कक्षा नौमा २०७४ को परीक्षाका लागि रजिस्ट्रेसन फाराम भरिसकेको बताए । परीक्षाका लागि उत्तरपुस्तिका छपाइको तयारी भइरहेको पनि रेग्मीले बताए ।
‘कक्षा दसको परीक्षाका लागि आवेदन फाराम भरेका विद्यार्थीको जिल्ला शिक्षा कार्यालयमा ‘इन्ट्री’ भइरहेको छ’, रेग्मीले भने । जिल्लाले इन्ट्री गरेपछि पनिकामा पठाउने व्यवस्था छ । २०७४ सालमा सञ्चालन गरिने कक्ष दसको परीक्षाका लागि पनि अहिले कक्षा नौमा रजिस्ट्रेसन भइरहेको छ ।
दस कक्षाको परीक्षामा सहभागी विद्यार्थीको सर्टिफिकेटमा ‘पास’ वा ‘फेल’ उल्लेख हुँदैन तर विद्यार्थीले प्राप्त गरेको जीपीए र ग्रेडअनुसार कक्षा एघारमा भर्ना हुन पाउने विषय तोकिएको हुनेछ ।
अघिल्लो वर्ष कक्षा दसको अन्त्यमा लिइएको एसएलसी परीक्षाका लागि नियमित र एक्जाम्टेड गरी झन्डै ६ लाख १५ हजारले आवेदन फाराम भरेका थिए ।
अब पनिकाले प्रश्नपत्र निर्माणलगायत कामलाई समेत निरन्तरता दिनेछ । केही जिल्लामा अघिल्ला वर्षका उत्तरपुस्तिका पनि बाँकी छन् । ती उत्तरपुस्तिका पनि यस वर्षको परीक्षामा प्रयोग गरिने रेग्मीले बताए । संशोधित शिक्षा ऐनले कक्षा १२ सम्मलाई विद्यालय तह मानेको छ ।
संशोधित शिक्षा ऐनले कक्षा १० मा क्षेत्रीय स्तरमा परीक्षा हुने भनेको छ तर राष्ट्रिय परीक्षा बोर्डको स्थायी संरचना बनेको छैन । क्षेत्रीय संरचना पनि छैनन् । तर कक्षा दसको अन्त्यमा लिइने परीक्षालाई के नाम दिने भन्ने विषयमा भने निर्णय हुन बाँकी छ ।
राष्ट्रिय परीक्षा बोर्डले पनिकासँग समन्वय गरी कक्षा दस र कक्षा बाह्रको अन्त्यमा दुईपटक एसएलसी परीक्षा लिने प्रस्ताव शिक्षा मन्त्रालयसमक्ष गरिसकेको छ । तर निर्णय हुन बाँकी छ ।
प्रतिक्रिया दिनुहोस !
