गायक सुराचले मायालुलाई घुमाएको भिडियो सार्वजनिक
काठमाडौँ: गायक सुराच प्रसाई यतिखेर आफ्नी मायालुलाई काठमाडौँ, पोखरा हुदै दार्जेलिङ्ग घुमाउन व्यस्त छन् । डेब्यु एल्बम जिन्दगीमा समावेश ‘नाइनलको सारी’गीतबाट स्रोता दर्शकमाझ छाप छाड्न सफल गायक प्रसाई ‘मायालाई’ बोलको गीतमार्फत् आफ्नी प्रेमीकालाई रमणीय स्थानहरु घुमाउन व्यस्त भएका हुन् ।
हिन्दुहरुको महान् पर्व दसैं र तिहारको अवसरमा मायालुलाई घुमाउने भिडियो लिएर गायक सुराच सार्वजनिक भएका हुन् । म्युजिक भिडियोमा घर छाडेर देश भित्र र देश बाहिर पुगेका युवाले आफ्नी प्रेमिकालाई फकाएको सन्दर्भ देख्न सकिन्छ ।
विभोर पोखरेलले निर्देशन गरेको भिडियोलाई अनिल के मानन्धरले खिचेका छन् । सुराचलाई भिडियोमा भिजे सुरक्षा पन्तले साथ दिएकी छिन् । नेपाली सांगीतिक क्षेत्रमा लोक फ्युजन शैलीका गीत कम्पोज गरेर गाउन रुचाउने गायक सुराचको नाइलनको सारी केही महिनाअघिमात्र सार्वजनिक भएको थियो।
सुराचले नेपाली लोक शैलीको यस गीतमा आधुनिकता मिसाउने प्रयास गरेको देखिन्छ । भिडियोमा आधुनिकता देखाउन गीतार, टुङ्गुना र सारंगीको मिश्रण देख्न र सुन्न पाइन्छ ।
पछिल्ला दिनमा नेपाली संगीत क्षेत्रमा नयाँ स्वाद पस्कदै आएका सुराच ‘जिन्दगी एल्बम’ सार्वजनिक गर्ने तयारीमा जुटेका छन् । तराईमा लोकप्रिय बनेको सिटी सफारीमा आधारित गीत समेत तयार भएको सुराचले अन्नपूर्णलाई बताए ।
प्रतिक्रिया दिनुहोस !
