'निर्देशन गर्ने बेला भएको छैन'
काठमाडौ: अमेरिकामा बस्दै आएकी अभिनेत्री जल शाह यति बेला काठमाडौंमा छिन् । छोटो समयका लागि नेपाल आएकी उनले आफ्नो पेसाप्रतिको झुकाव कायमै रहेको बताइन् । आठ वर्षदेखि अमेरिका बस्दै आएकी उनले सधैं नेपाली चलचित्र उद्योगलाई 'मिस' गरिरहेको बताइन् । 'अमेरिकामा बसे पनि म सधैं देश र चलचित्र उद्योगलाई मिस गरिरहेकी हुन्छु', शनिबार सञ्चारकर्मीसँग अनौपचारिक कुराकानी गर्दै उनले भनिन् ।
नेपाल फर्केर फेरि चलचित्र उद्योगमा छिर्ने योजना छ कि ? भन्ने जिज्ञासमा उनले भनिन्, 'अमेरिका र काठमाडौं दुवैतिर घर छ । आउने जाने गरिरहन्छु । बीचमा मिल्यो भने राम्रो चलचित्रमा सामाजिक भूमिकामा काम गर्ने इच्छा छ ।' उनले गाउँले परिवेश समेटेर बनाइएका चलचित्रमा आफूले सही भूमिका पाए खेल्ने बताइन् ।
तपाईंभन्दा पछि चलचित्र उद्योगमा प्रवेश गरेका नायिकाले पनि चलचित्र निर्देशन गर्न थालेका छन् नि ? भन्ने प्रश्नमा शाहले चलचित्र निर्देशन गर्ने वा निर्माण गर्ने कुनै योजना नभएको बताइन् । 'अहिले चलचित्र निर्देशन गर्ने मेरो बेला भएजस्तो लाग्दैन', उनले भनिन् ।
आफूले सधैं अभिनयलाई जोड दिने गरेको भन्दै शाहले अहिले पनि आफूले सहज रूपमा अभिनय गर्नसक्ने बताइन् । छोरीलाई लिएर काठमाडौं आएकी शाह वीरगन्ज पनि पुगिन् । नेपाल आउनुअघि उनले केही दिन भारतको मुम्बईमा बिताइन् ।
चलचित्र उद्योगमा प्रवेश गर्दाका सुरुआती दिन स्मरण गर्दै शाहले भनिन्, 'आमा प्रेमा शाहले प्रकाश थापा अंकलसँग मलाई चलचित्रमा खेलाउने कुरा गर्नुभएछ तर मलाई ज्ञान थिएन । सुरुमा श्रीस्वस्थानीमा एक नारीको रूपमा खेल्न आग्रह गरिएको थियो । मैले संस्कृतका श्लोकहरू बोल्न सकिनँ । त्यो भूमिका पछि नायिका पूजा चन्दलाई दिइयो । पछि मैले चलचित्र अवतारबाट करिअर सुरु गरेँ ।'
चलचित्र उद्योगको उन्नतिका लागि सञ्चारकर्मीको भूमिका महत्त्वपूर्ण रहेको उनले बताइन् । 'हाम्रोबारेमा पत्रकारले जस्तो लेखिदिन्छन्, जनतामा त्यस्तै इमेज बन्छ । म आग्रह गर्छु, यहाँहरूले हाम्रा बारेमा सकारात्मक कुराहरू सम्प्रेषण गरिदिनुहुनेछ', उनले भनिन् ।