पेश्की फछ्र्योट गर्न केन्द्रीय तहशिलमा विवरण पठाइँदै
विराटनगरः लामो समयदेखि बाँकी रहेको पेश्की रकम फछ्र्योटमा कठिनाइ भएपछि विराटनगर उपमहानगरले केन्द्रीय तहशिल कार्यालयमा विवरण पठाउने तयारी गरेको छ ।
राजनीतिक दलका नेता, संघसंस्था र अन्य पक्षबाट उपमहानगरले असुल गर्नुपर्ने पेश्कीबापतको रकम ३ करोड ५० लाख रुपैयाँ बाँकी छ । लामो समयको प्रयासपछि पेश्की रकम फछ्र्योट नभएपछि केन्द्रीय तहबाटै समस्या सुल्झाउन प्रयास थालिएको उपमहानगरका कार्यकारी अधिकृत दीपक कोइरालाले जानकारी दिए ।
‘केन्द्रीय तहशिल कार्यालयामा सम्पूर्ण विवरण गइसकेपछि पेश्की रकम फछ्र्योट नगर्नेहरूले सार्वजनिक पदमा उम्मेदवारी दिन पाउँदैनन् । आउँदो निर्वाचनलाई दृष्टिगत गरी हामीले यस्तो प्रयास थालेका हौं', उनले भने । पेश्की रकम फछ्र्योट नभई स्थानीय निकायमा उम्मेदवार दिन नपाइने भएकाले फरफारक हुने अपेक्षा रहेको उनले बताए ।
आव २०६९÷७० सम्म ५ करोड ५० लाख रुपैयाँ पेश्की फछ्र्योट हुन बाँकी रहेको उपमहानगर लेखा महाशाखाको भनाइ छ । तर, यो बेरुजु घटाउन नगर परिषद्ले प्रयास थालेपछि घटेर ३ करोड ५० लाख रुपैयाँमा पुगेको हो । संघसंस्थाबाट बिल भर्पाइ पेस भई २ करोड रुपैयाँ बेरुजु घटेको थियो ।
‘बाँकी रहेको पछिल्लो पेश्की भने क्रोनिक खालको हो । नगरपालिकाका स्थापना भएदेखिकै बेरुजु पनि देखिएकाले यसलाई अब केन्द्रीयस्तरबाटै सुल्झाउने प्रयास थालिएको हो', उपमहानगरका लेखा अधिकृत सञ्जीव भट्टराईले भने । स्थानीय विकास मन्त्रालयको सहमतिमा विराटनगर उपमहानगरले बेरुजु विवरणको फाइल तयार गरी केन्द्रीय तहशिल कार्यालयमा पठाउन लागेको उनको भनाइ छ ।
तहशिल कार्यालयमा सप्रमाण विवरण पेश भएपछि विराटनगर उपमहानगरको नाममा रहेको बेरुजु शून्यमा झर्ने र यो फछ्र्योट गर्ने जिम्मा केन्द्रकै हुने भट्टराईले बताए । तिहारपछि नै सबै फाइल केन्द्रमा पठाउने गरी अहिले काम भएको छ । ‘बढीमा ८ लाख रुपैयाँदेखि थोरैमा २० हजार रुपैयाँसम्म पेश्की फछ्र्योट हुन बाँकी देखिन्छ', उनले भने । प्रक्रिया पूरा भएपछि केन्द्रबाट कामकारबाही थालिने भएकाले फछ्र्योटमा सहज हुने उनले बताए ।
विराटनगर उपमहानगरपालिकाले पेश्कीबापतको बेरुजु फछ्र्योट गर्न सार्वजनिक रूपमै आह्वान गरेको छ । तर, अटेर गर्ने प्रवृत्तिका कारण बेरुजुको दर बढ्दो क्रममा पुगेको हो । ५ वर्षअघि उपमहानगरले बेरुजु फछ्र्योट गर्न नगरपरिषद्ले निर्णय गरी समिति नै बनाई काम गरेको थियो । समिति सक्रिय भएपछि ठूलो परिमाणमा बेरुजु फछ्र्योट भएको थियो ।
प्रतिक्रिया दिनुहोस !
