चीनबाट बाबुरामको प्रश्नः देशलाई कंगाल पारेर पाहुनाको सत्कार किन ?
काठमाडौं: चीन भ्रमणमा रहेका नयाँ शक्ति नेपालका संयोजक एवम् पूर्वप्रधानमन्त्री बाबुराम भट्टराईले भारतीय राष्ट्रपतिको नेपाल भ्रमणका दिन दिइएको सार्वजनिक विदाको विरोध गरेका छन् ।
सामाजिक सञ्जाल ट्वीटरमार्फत् भट्टराईले बिहीबार मन्त्रिपरिषद्ले गरेको निर्णयको विरोध गरेका हुन् । उनले पाहुनाको सत्कार गर्नुपर्ने तर विदा गरेर, काम छोडेर र देशलाई अरुकंगाल बनाएर बिदा दिनु नहुने तर्क गरेका हुन् ।
उनले भिक्षापात्र थापेर मित्र खुशी नहुने बताउदै निर्णय गर्नुअघि सोच्नुपर्ने समेत बताएका छन् । बाबुराम ट्वीट गर्छन्, ‘विदेशी पाहुनाको सत्कार हुनुपर्छ तर विदा गरेर, काम छोडेर, देशलाई अरुकंगाल पारेर, भिक्षापात्र थापेर हाम्रा सच्चामित्रहरु खुशी हुनुहोला र ? सोचौं है !’
विदेशीपाहुनाको सत्कार हुनुपर्छ!तर विदा गरेर/काम छोडेर/देशलाई अरूकंगाल पारेर/भिक्षापात्र थापेर हाम्रा सच्चामित्रहरू खुशी हुनुहोला र?सोचौं है!
— Baburam Bhattarai (@brb1954) October 27, 2016
बिहीबारको मन्त्रिपरिषद् बैठकले चीन र भारतका राष्ट्रपति नेपाल भ्रमणमा आउने दिन सार्वजनिक विदा दिने निर्णय गरेको हो ।
बैठकले चिनियाँ राष्ट्रपति सी जिन पिङ र भारतीय राष्ट्रपति प्रणव मुखर्जी नेपाल भ्रमणमा आउने दिन सार्वजनिक विदा दिने निर्णय गरेको हो ।
भारतीय राष्ट्रपति मुखर्जी नेपालको औपचारिक भ्रमणमा आगामी कात्तिक १७ गते आउँदैछन्। तर, चिनियाँ राष्ट्रपति जिन पिङ भने नेपाल आउने तय भएको छैन। चिनियाँ राष्ट्रपति आउने मिति नतोकिए पनि सार्वजनिक विदा घोषणा भने भइसकेको छ ।
प्रतिक्रिया दिनुहोस !
