इन्टरनेटबिना बाटो पत्ता लगाउन 'म्याप्स डट मी'

प्रविधिको युगमा आवश्यकताअनुसार प्रविधिको सहयोग लिन सके हरेक कुरा सहज हुन्छ । आफूले चाहेको स्थान कसैलाई नसोधी एन्ड्रोइड र आईओएस मोबाइलमार्फत पत्ता लगाउन सकिन्छ । ल्याटट्युड र लंगिट्युडबाट लोकेसन थाहा पाउन सकिन्छ ।

ल्याटट्युड र लंगिट्युडका बारेमा जानकारी दिने वेब तथा एन्ड्रोइड र आईओएसजस्ता मोबाइल अपरेटिङ सिस्टमका लागि भनेर थुप्रै एप्लिकेसन्सको विकास भइसकेका छन् । तीमध्ये, गुगलले डेभलप गरेको 'गुगल म्याप्स' धेरैले प्रयोग गर्छन् । गुगल म्याप्समा कुनै पनि ठाउँबारे खोज गर्न इन्टरनेटको अवश्यकता पर्छ । एकपटक कुनै पनि ठाउँको खोज गरिएको छ भने त्यस क्षेत्रको म्याप मोबाइलमा 'क्यास डेटा'का रूपमा बस्छ, जसको कारण पुनः त्यस ठाउँको म्याप हेर्न चाहेमा हरेक चोटि इन्टरनेट आवश्यक पर्दैन ।

कुनै एक ठाउँबाट कतै जानु छ र ती दुई ठाउँबीचको मार्ग चाहिएको छ भने गुगल म्यापमा इन्टरनेटको आवश्यकता पर्छ तर हरेक समय इन्टरनेट उपलब्ध हुन्छ भन्ने छैन । यस्तो समयमा 'म्याप्स डट मी' एप प्रयोग गर्न सकिन्छ 'म्याप्स डट मी' निःशुल्क र छिटो छरितो अफलाइन् म्याप र जीपीएस न्यामिगेसन एप हो, जसको प्रयोग इन्टरनेटबिनै गर्न सकिन्छ ।

कुनै पनि ठाउँको म्याप पहिले नै डाउनलोड गरेर त्यस ठाउँवरिपरि रेस्टुरेन्ट, क्याफे, पर्यटक आकर्षण, होटल, एटीएम तथा सार्वजनिक परिवहन सजिलै खोज्न सकिन्छ । एक चोटि वाईफाई वा कुनै नेटवर्कदेखि म्याप डाउनलोड गरिसकेपछि, अरू कुनै कुराको चिन्ता लिन पर्दैन । 'म्यप्स डट मी'ले 'ओपन स्ट्रटी म्याप'को डेटा प्रयोग गरेर त्यसै डेटामाथि आफ्नो एप र एल्गोरिदम डेभलप गरेको छ ।

यो एपको प्रयोग हिँड्दा, साइक्लिङ गर्दा होस् वा गाडी चलाउँदा, आफ्नो अनुकूल मिलाएर प्रयोग गर्न सकिन्छ । आफू जाने वा पुग्नुपर्ने लोकेसनलाई यस एपमा गएर खोज्न सकिन्छ । आफूले खोजेको लोकेसनको बाटो पाउन सकिन्छ ।

यो काम गुगल म्याप्समा पनि गर्न सकिन्छ तर मार्ग पत्ता लगाउन, रेस्टुरेन्ट, क्याफे आदि इत्यादि खोज गर्न इन्टरनेट आवश्यक पर्छ । करोडौं प्रयोगकर्ता रहेका यो एप दुवै एन्ड्रोइड र आईओएस मोबाइल अपरेटिङ सिस्टमका लागि उपलब्ध छ । 'गुगल प्ले स्टोर' र 'एप स्टोर'देखि सजिलै निःशुल्क डाउनलोड गरेर प्रयोग गर्न सकिन्छ ।