प्रहरी कार्यालयमा सामूहिक भाइटिका
राजविराजः हिन्दुहरुको दोश्रो ठूलो पर्व तिहारको अन्तिम दिन घर जान नपाएका प्रहरीले मंगलबार जिल्ला प्रहरी कार्यालयमै सामूहिक भाइटिका लगाएर मनाएका छन् ।
बिदा नपाएर घर जान नपाएका जिल्ला प्रहरी कार्यालय सप्तरीमा कार्यरत प्रहरीहरुले राजविराजमा हर्सोल्लासका साथ श्रद्धा, आस्था र निष्ठाका साथ भाइटिका लगाएर मनाए ।
दिदीबहिनीले सामुहिक रुपमा सप्तरङ्गी टिका र सयपत्री फुलको माला लगाइ दिएर दाजुभाईको दिर्घायू र पदोन्नतीको कामना गरे भने दाजुभाईले सुरक्षा र स्वास्थ्यको प्रार्थना गरे । टीका लगाइदिएपछि प्रहरी दिदीबहिनीले प्रहरी दाजुभाईलाई सेलरोटी, दहीलगायतका खानेकुरा दिए र दाजुभाइले दिदीबहिनीलाई गच्छेअनुसार दक्षिणा दिई सम्मान प्रकट गरे ।
नेपाली मौलिक धर्म संस्कृतिको जगेर्ना गर्ने तथा घर जान नपाएकाहरुको न्यास्रोपन हटाउन सामुहिक भाइटिकाको आयोजना गरिएको प्रहरी उपरिक्षक भिमप्रसाद ढकालले बताए ।
ढकालका अनुसार कार्यक्षेत्रमै रहेर पनि आफ्नो धर्म, संस्कृति, परम्परा र रितीरिवाजको जगेर्ना गर्ने तथा रमाईलो जमघटसँगै गाउँघरको झल्को मेटाउने प्रयासस्वरूप कार्यक्रम गरिएको हो । भाइटिका समारोहपछि उनीहरुले सँगै खानपिन गरी देउसी भेलो गाउँदै नाचे ।
टिका समारोहमा सहभागी प्रहरीहरुले प्रहरी सेवामा प्रवेशपछि भाइटिका लगाउन नपाएको दुखेसो गरे । सोलुखुम्बु काकु २ का प्रहरी हवल्दार अर्जुन राईका दिदीबहिनी काठमाडौं र सुनसरीमा भएकोले जागिर खाएको १३ वर्षमा जम्मा एक पटक मात्र टिका लगाउन पाएको बताए ।
निधार खाली राख्नुभन्दा जहाँ बस्यो त्यहीं भाइटिका मनाएर दाजुभाई र दिदीबहिनी बिचको प्रेममय सम्बन्धलाई रंगहरु जस्तै सँधै गाढा, ताजा र प्रज्वल बनाउनु पर्ने सखुवासभा खाँदवारी ३ की प्रहरी सुनीता कार्की बताउँछिन् ।
उनले पनि जागिर खाएको चार वर्षमा टिका लगाउन पाएकी थिइनन् भने भोजपुर हेलाउछौ ७ की छिरिङ डोल्मा तामाङका दाजु मलेशियामा भएकाले तीन वर्षदेखि टिका लगाउन पाएकी थिइनन् । सुनसरी डुम्राहा ३ घर भएकी प्रहरी आशाकुमारी चौधरीका दाजु झापामा सशस्त्र प्रहरी बलमा कार्यरत भएकाले दुबैलाई विदा पाउन गाह्रो छ । दाजुभाई दिदीबहिनीबीच भेटघाट हुने अवसरका रुपमा रहेको भाइटीकामा नयाँ सम्बन्ध जोडन पाएकोमा चौधरीले खुशी व्यक्त गरिन् ।
उदयपुर जोगिदह ७ की प्रहरी बुनु दाहालकी दुई दाजुमध्ये एक जना इलाममा प्रहरी सेवामा कार्यरत र अर्का मलेशियामा रोजगार रहेकाले तीन वर्षदेखि टिका लगाउन पाएकी थिइनन् भने झापाको पृथ्वीनगर ३ घर भएका प्रहरी राजेश तामाङले पाँच वर्षदेखि टिका थाप्न पाएका थिएनन् ।
घर जान नपाए पछि पहिलो पटक उनीहरुले आफुसँगै कार्यरत प्रहरीहरुलाई दाजुभाई, दिदीबहिनी मानेर टिका ग्रहण गरे । झापा ज्यमिरगढी १ का राम सरेनकी तीन दिदीबहिनी झापाको केचना, घैलाडुब्बा र भारत विहारको किशनगञ्जमा छिन् । सुनसरीको इनरुवामा रहेकी मितदिदीकहाँ पनि जान नपाए पछि सरेनले पनि आफुसँगै कार्यरत प्रहरी दिदीबहिनीको हातबाट टिका थापे ।
देश र जनताको सेवामा गर्व गर्दै उनीहरु वर्ष दिनको चाडपर्व रमाइलो गरी मनाउनु पर्ने बताउँछन् । सप्तरङ्गी टीकामा रङ्गिविरङ्गी भावनाहरु मिसिएकाले टिका ग्रहणपछि मनमा शान्ति मिलेको उनीहरुले बताए ।