तरकारीवाली भन्छिन्ः मोडलिङ गर्न तयार छु
काठमाडौं: सामाजिक सञ्जालमा तरकारीवालीको नामले चर्चित कुसुम श्रेष्ठले प्रस्ताव आए मोडलिङ गर्न तयार भएको बताएकी छिन् ।
सञ्चारकर्मी सविना कार्कीसँग कुरा गर्दै कुसुमले प्रस्ताव आए मोडलिङ गर्न तयार भएको बताएकी हुन् । सामाजिक सञ्जालमा तरकारीको क्रेट बोकेको तस्बिर भाइरल भएपछि उनको चर्चा विभिन्न कोणबाट भइराखेको छ ।
यस अघि पाकिस्तानका चियावाला युवा अरसद खान सामाजिक सञ्जालमा भाइरल भएपछि चलचित्र क्षेत्रमा लागेको विषयलाई जोड्दै कुसुमलाई धेरैले मोडलिङमा लाग्न सुझाव दिएका छन् ।
यसै सन्दर्भमा भएको कुराकानीमा कुसुमले प्रस्ताव आए मोडलिङमा लाग्न तयार भएको बताएकी हुन् । त्यस्तो प्रस्ताव आए तपाईं तयार हुनुहुन्छ भन्ने प्रश्नमा कुसुमले भनिन्, ‘हो म मोडलिङ गर्न चाहन्छु ।’ यद्यपी कुसुमले अभिनय सम्बन्धी कुनै तालिम अझैसम्म लिएकी छैनन् ।
चितवन र गोरखाबीचको त्रिशुली नदीको झोलुङ्गे पुलमा तरकारी बोकेर हिड्दै गरेकी कुसुमको तस्बिर पर्यटन व्यवसायी रुपचन्द्र महर्जनले खिचेका थिए। तस्बिर खिचेर महर्जनले फेसबुकमा राखेपछि उनको तस्बिर भाइरल भएको हो ।
सामाजिक सञ्जालमा कुसुमको तस्बिर भाइरल भएपछि महर्जनले भने आफ्नो फेसबुकबाट तस्बिर हटाइसकेका छन् । महर्जनले अनुमतिबिना कुसुमको तस्बिर खिचेको सार्वजनिक भएको छ । तस्बिरका सन्दर्भमा सोधेको प्रश्नमा उनले भनिन्, ‘फोटो खिचेको थाहा थिएन । साथीले भनेपछि मात्र थाहा पाएँ।’
अनुमतिबिना फोटो खिच्दा कस्तो लाग्यो भन्ने प्रश्न कुसुम भन्छिन्, ‘मलाई डर लागेको थियो । पछि सबैले राम्रो भन्नुभयो । पछि चाहिँ नराम्रो कमेन्ट गर्न सक्छन् भन्ने डर अझै छ ।’
यसरी सकारात्मक प्रतिक्रिया दिने सबैलाई कुसुमले धन्यवाद दिएकी छिन् । लाखौँ सामाजिक सञ्जाल प्रयोगकर्ताले मन पराए पनि कुसुम आफैलाई भने आफू राम्री छु जस्तो लाग्दैन । उनी अनुहार भन्दा मानिसको व्यवहार राम्रो हुनुपर्ने धारणा राख्छिन् । ‘त्यत्ति राम्री त छैन । मान्छे राम्रो हुन मन राम्रो हुनुपर्छ भन्ने लाग्छ ।’
गोरखा वाङलिङकी कुसुम अहिले चितवनको टांडीमा क्वेष्ट मोडल कलेजमा कक्षा ११ मा पढ्दै छिन् । कुसुम चन्द्रनारायण र ज्ञानु श्रेष्ठीकी एक्ली छोरी हुन् । कुसुमले दसैं तिहारको बिदामा घर पुग्दा आफूले बुबा आमालाई सघाउन तरकारी बोक्ने र पसलमा काम गर्ने गरेको बताएकी छिन् ।
कुसुम सरल भएको र उनले परिवारलाई सहयोग गरेको भन्दै सामाजिक सञ्जालमा करोडौंले उनलाई मन पराएका छन् । धेरै भारतीयहरुले नेपाली तरकारीवाली र पाकिस्तानी चियावालाको तुलना गरेर खबर सार्वजनिक गरेका छन् ।
सामाजिक सञ्जाल प्रयोगकर्ताले ट्वीटरमा तरकारीवालीको नाममा ह्यासट्यागमा टे«न्डिङ नै चलाएका छन् । सामाजिक सञ्जालमा चर्चा पाएर सुरुमा डराएकी कुसुम पछिल्ला दिनमा भने खुशी छिन् । ‘सबैतिर चर्चा पाइरहदा खुशी लागेको छ,’ कुसुमले भनिन् । सविना कार्कीले कुसुम श्रेष्ठसँग गरेको अडियो वार्ता सुनुहोस्