लन्डनः स्पेनिस क्लब बार्सिलोनाका अर्जेन्टिनी स्ट्राइकर लियोनल मेसी प्रायः शान्त रहन्छन् । उनी मैदानभित्र होस या बाहिर विपक्षीसँग झगडा गरेको समाचार प्रायः सुनिएको छैन ।
मंगलबार युरोपियन च्याम्पियन्स लिगमा इङ्लिस प्रिमियर लिग क्लब म्यानचेस्टर सिटीसँग पराजित भएपछि भने मेसीले आफ्नो फरक रूप देखाएका छन् । बेलायती सञ्चारमाध्यमले जनाएअनुसार मेसी म्यान सिटीका प्रशिक्षकविरुद्ध जाइलागेका थिए ।
बार्सिलोना म्यान सिटीसँग उसैको मैदानमा ३–१ गोलले पराजित भएको थियो । त्यो जित म्यान सिटीले बार्सिलोनाविरुद्ध हात पारेको अहिलेसम्मकै पहिलो जित थियो । त्यसैले बार्सिलोनाकै पूर्वप्रशिक्षक पेप ग्वार्डिओलाको नेतृत्वमा ऐतिहासिक जित हात पारेपछि म्यान सिटीका अर्का प्रशिक्षक मिकेल अर्टेटा निकै खुसी देखिए । मैदानमा आफ्ना खेलाडीसँग खुसी साटासाट गरेपछि अर्टेटा ठूलो स्वरमा आफ्नो टोलीको पक्षमा हुटिङ गर्दै ‘ड्रेसिङ रुम’ तर्फ लागेका थिए ।
ड्रेसिङ रुमतर्फ जाने क्रममा मेसी र अर्टेटाको भेट टनेलमै भएको थियो । आफ्नो टोलीको जितमा हर्षित देखिएका अर्टेटालाई देखेपछि मेसी निकै रिसाए । मेसीले अर्टेटालाई बाटोमा नभई ड्रेसिङ रुमभित्र गएर खुसी मनाउन सुझाव दिएका थिए । अर्टेटाले भने मेसीलाई कुनै जवाफ फर्काएनन्, त्यसैले उनीहरूबीच ठूलै विवाद भने भएन । यद्यपि अर्टेटालाई उद्धृत गर्दै बेलायती सञ्चारमाध्यमले जनाएअनुसार मेसी निकै रिसाएका थिए ।
इङ्लिस क्लब आर्सनल र एभर्टनका पूर्वमिडफिल्डर ३४ वर्षीय अर्टेटाले कुनै समय बार्सिलोनाको ‘सी’ र ‘बी’ टोलीबाट पनि खेलेका थिए । यद्यपि मेसी बार्सिलोनाको सिनियर टोलीमा आउनुअघि नै अर्टेटाले क्याम्प नाऊ छाडिसकेका थिए । घटना सार्वजनिक भएपछि म्यान सिटीले आधिकारिक वक्तव्य सार्वजनिक गर्दै मेसीसँगको झगडामा अर्टेटाले कुनै गल्ती नगरेको दाबी गरेको छ ।
‘मेसीसँगको झगडामा अर्टेटाको कुनै गल्ती नभएको कुरा क्लब स्पष्ट पार्न चाहन्छ’, म्यान सिटीले विज्ञप्तिमार्फत भनेको छ ।
राष्ट्रिय टोलीमा मेसीका सहकर्मी तथा म्यान सिटीका स्ट्राइकर सर्जियो एगुएरोले समेत घटनाको पुष्टि गरेका छन् । एगुएरोले उक्त विवाद साम्य बनाउन आफू अघि सर्नु परेको बताएका छन् ।
‘आफ्नो टोली पराजित भएपछि कुनै पनि खेलाडी खुसी हुँदैनन्’, एगुएरोले भनेका छन्, ‘मेसी पनि दुःखी थिए । उनलाई म राम्रोसँग बुझ्छु । त्यसैले मैले उनीसँग कुरा गरें । त्यस्तो नकारात्मक कुरा केही भएको थिएन ।’ एक स्पेनिस रेडियो ‘कोप’ ले भने घटनामा मेसीकै दोष रहेको दाबी गरेको छ । उक्त रेडियोले मेसी नै म्यान सिटीको ड्रेसिङ रुमसम्म पुगेको जनाएको छ ।
प्रतिक्रिया दिनुहोस !
