काठमाडौं: मलेसियामा जारी 'एएफसी सोलिडारिटी कप फुटबल प्रतियोगिता' मा नेपालले आफ्नो पहिलो खेल शनिबार टिमोर लिस्टेसँग खेल्दै छ । सोलिडारिटी कपको समूह 'ए' मा नेपाल र टिमोर लिस्टेसँगै ब्रुनाई पनि छ । टिमोर लिस्टे भने आफ्नो पहिलो खेलमा ब्रुनाईसँग ४-० गोलको फराकिलो अन्तरले पराजित भएको थियो । नेपाल र टिमोर हालसम्म दुईपटक आमनेसामने भएकोमा ती दुवै खेलको नतिजालाई नेपालले आफ्नो पक्षमा पारेको थियो । ती दुई खेलमा नेपालले टिमोरविरुद्घ सात गोल गरेको थियो भने केवल एक गोल खाएको थियो ।
नेपाली टोलीका प्रशिक्षक ग्योतुकी कोजीले पहिलो खेलमा ब्रुनाईसँग पराजित भए पनि आफूले टिमोर लिस्टेलाई कमजोर प्रतिद्वन्द्वीका रूपमा नलिएको बताएका छन् । 'टिमोरले पहिलो खेलमा जस्तो खेले पनि हामीले भने उसलाई कमजोर प्रतिद्वन्द्वीका रूपमा लिएका छैनौं । सिमसिमे वर्षाबीच भएको उक्त खेलमा टिमोरले स्वभाविक प्रदर्शन गर्न नसकेको हुन सक्छ । त्यसैले शनिबारको खेलमा पनि हामी आफ्नो पूर्ण क्षमतासहित मैदानमा ओर्लने छौं', कोजीले भनेका छन् ।
प्रशिक्षक कोजुले आफ्नो टोली दुवै खेलमा विजयी हुने दाबी पनि गरे । 'हामी मलेसिया आएदेखि नै नियमित रूपमा अभ्यास गरिरहेका छौं र यहाँको मौसमसँग अभ्यस्त हुने प्रयासमा छौं । यहाँको चिस्यानयुक्त मैदानमा खेल्नु पक्कै पनि फरक अनुभव हुनेछ', उनी भन्छन् । नेपालले आफ्नो अन्तिम खेल कात्तिक २३ गते ब्रुनाईसँग खेल्नेछ । सोही समूहमा रहेको बंगलादेशले प्राविधिक कारण देखाउँदै अन्तिम समयमा आएर नखेल्ने निर्णय गरेपछि दोस्रो चरणमा पुग्न नेपालका लागि केही सहज हुने देखिएको छ । समूहगत चरणमा नेपालले एक खेल जिते सेमिफाइनलको यात्रा तय गर्नेछ ।
टिमोरका प्रशिक्षक फाबियो डा सिल्भा पनि मौसमको विषयले चिन्तित देखिएका छन् । 'नेपाल हाम्रा लागि कडा प्रतिद्वन्द्वी हो भन्ने कुरा मैले राम्ररी बुझेको छु तर, त्योभन्दा पनि बढी खेल हुने दिनको मौसम कस्तो होला भन्ने चिन्ताले मलाई सताएको छ', उनी भन्छन् । वर्षाकै कारणले ब्रुनाईविरुद्घको खेलमा आफ्ना खेलाडीले स्वाभाविक प्रदर्शन गर्न नसकेको दाबी पनि गरे ।
प्रतियोगिताको समूह 'बी' मा श्रीलंका, लाओस, मकाउ र मंगोलियाबीच प्रतिस्पर्धा हुनेछ । लिग कम नकआउटका आधारमा खेलिने उक्त प्रतियोगितामा समूहका दुई उत्कृष्ट टोली सेमिफाइनलमा प्रवेश गर्नेछन् । सेमिफाइनल खेल कात्तिक २७ र फाइनल खेल कात्तिक ३० गते खेलिनेछ । एएएफसीले एएफसी च्यालेन्ज कप आयोजना गर्न छाडेपछि त्यसैको सट्टामा यस वर्षदेखि सोलिडारिटी कप आयोजना गर्न लागेको हो ।
एएफसीले सन् २०१८ को विश्वकप छनोट र सन् २०१९ को एसिया कप छनोट चरणबाट बाहिरिएका टोलीलाई सोलिडारिटी कपमा सहभागी गराउन लागेको हो । विश्वकप छनोटका लागि भएको प्रारम्भिक छनोट खेलमा नेपाली टोली भारतसँग पराजित हुँदै बाहिरिएको थियो । नेपाली राष्ट्रिय टोलीले आठ महिनापछि औपचारिक प्रतियोगितामा सहभागिता जनाउन लागेको हो । नेपालले आठ महिनाअघि बंगलादेशको ढाकामा सम्पन्न बंगबन्धु गोल्ड कप र भारतको गुवाहाटीमा सम्पन्न १२ औं दक्षिण एसियाली खेलकुद (साग) को उपाधि जितेको थियो ।
नेपाली टोलीमा विकेश कुथू, किरनकुमार लिम्बू र विशाल श्रेष्ठ गरी तीनजना गोलरक्षक छन् । यसैगरी रक्षकमा रविन श्रेष्ठ, विराज महर्जन, अनन्त तामाङ, दीपक गुरुङ, आदित्य चौधरी, कमल श्रेष्ठ, देवेन्द्र तामाङ र रञ्जित धिमाल रहेका छन् । मिडफिल्डरमा विशाल राई, हेमन गुरुङ, विक्रम लामा, अञ्जन विष्ट, सुजल श्रेष्ठ र राजेन्द्र रावल रहेका छन् । स्ट्राइकरमा भने विमल घर्तीमगर, रञ्जन विष्ट, अनिल गुरुङ, सुमन लामा, नवयुग श्रेष्ठ र भरत खवास छन् । नेपाली टोलीका अन्य दुई प्रशिक्षकमा राजुकाजी शाक्य र गोलरक्षक प्रशिक्षक उज्ज्वल मानन्धर छन् ।
प्रतिक्रिया दिनुहोस !
