छठको दोस्रो दिन ब्रतालुले खरना पूजा गरे
वीरगन्जः श्रद्धा, भक्ति एवम् निष्ठापूर्वक मनाइने छठ पर्वको दोस्रो दिन शनिबार साँझ ब्रतालुले खरना पूजा गरेका छन् । छठको दोस्रो दिन अर्थात् पन्चमी तिथीलाई खरना पनि भनिन्छ । शुक्रबार छठको पहिलो दिन नुहाइधुवाई गरेर शुद्ध भइ शाकाहारी भोजन ग्रहण गरेर विधिवत रुपमा छठ पर्व शुरु गरेका व्रतालु शनिवार दिनभरि निर्जला व्रत बसे ।
शनिवार साँझ ब्रतालुले नुहाएर चोखो भई आफ्नो कुल देवताको पूजा कोठामा माटोको चुल्हो बनाएर त्यसैमा चामल र भेलीको खीर (रसीआव) तथा गहुँको रोटी प्रसादका रुपमा पकाएर बेलुकी चन्द्रोदय पछि चन्द्रमालाई चढाएर पूजापाठ गरे । त्यपछि ब्रतालुले उक्त प्रसाद ग्रहण गरेर फेरि निर्जला ब्रत लिएका छन् ।
सोमबार पर्ने छठको तेश्रो दिन अर्थात षष्ठी तिथीलाइ छठको मुख्य दिन मानिन्छ । जसलाइ सँझीया घाटे पनि भनिन्छ । सोमबार सँझिया घाटेका दिन ब्रतालु महिलाले नदी, पोखरी, तलाउलगायत जलाशयमा तयार पारिएको छठघाटमा पुगेर साँझ पख अस्ताउदो सूर्यलाई र भोली पल्ट सप्तमीका दिन बिहान उदाउँदो सूर्यलाई अर्घ दिएर पूजापाठ गरेपछि छठ पर्व विधिवत रुपमा समापन हुन्छ ।
छठपूजामा सूर्य भगवान र छठी मातालाई पूजापाठ र अर्घ दिनका लागि गहुँ वा चामलको पिठोबाट ठेकुवा बनाउने गरिन्छ। यस्तै मुला, गाजर, बेसारको हरियो बेर्ना, ज्यामिर, नरिवल, सुन्तला, केरा, स्याउ, पानी सिंगडा, सुथनी, उखु, बोडीलगायतका फलफुल पनि सूर्य भगवान र छठी मातालाइ अर्घ दिने गरिन्छ । छठ पर्वमा व्रत गरे दुःख र दरिद्रताबाट मुक्ति पाइन्छ भन्ने धार्मिक जनविश्वास रही आएको छ ।
यस्तै छठ सुरु भएसंगै वीरगन्जका चोक, गल्ली, पसल र घरमा छठका गीत–सङ्गीत गुञ्जयमान भएको छ । दरमुकाम वीरगन्जमा मात्रै एक दर्जन भन्दा बढी पोखरी, नदी, तलाउको किनारमा छठघाट बनाइएको छ ।
छठ पर्वका लागि नदी, तलाउ, पोखरीलगायतका जलाशयलाई रंगीचंगी बनाइएको छ । वीरगंजको घडीअर्वा, रानीघाट, मुर्ली, सिर्सिया, छपकैया, नगवा, रामगढवा, बहुअरी, आदर्शनगरको स्वीमीङ पुललगायतका छठघाट भव्य रुपमा सजाइएको छ ।