घुमफिर वर्षको प्रवद्र्धन गर्न पर्यटकीय प्याकेज
काठमाडौं: नेपालको आन्तरिक पर्यटक प्रवद्र्धन र घुमफिर वर्षको औचित्य पुष्टि गर्न नेपाल पर्यटन बोर्डले विभिन्न पर्यटकीय संस्थाको सहकार्यमा पर्यटकीय प्याकेज निर्माण गर्न थालेको छ । विभिन्न पर्यटकीय गन्तब्यको प्रवद्र्धनात्मक प्याकेज बनाउन थालिएको बोर्डका प्रमुख कार्यकारी अधिकृत (सीईओ) दीपकराज जोशीले बताए । उनका अनुसार व्यावसायिक प्याकेजले निजी क्षेत्रको सहकार्यमा पर्यटकीय गतिविधि बढाउने बोर्डको योजना रहेको छ ।
पर्यटन बोर्डले नेपाल एशोसिएसन अफ टुर एन्ड ट्राभल एजेन्ट्स (नाट्टा), ट्रेकिङ एजेन्सिज एशोसिएसन अफ नेपाल (टान) र सोसाइटी अफ ट्राभल एन्ड टुर अपरेटर्स (सोट्टो) नेपालसँगको सहकार्यमा प्याकेज सार्वजनिक गरेको हो । पर्यटकीय संस्थाले यस्ता पर्यटकीय प्याकेज बनाएर प्रवद्र्धन गर्न अनुरोध गरेका कारण निजी क्षेत्रको सहकार्यमा प्याकेज तयार गरिएको बोर्डले जानकारी दिएको छ ।
धेरैले घुमफिर वर्षलाई नै दृष्टिगत गरेर प्याकेज ल्याउन अनुरोध गरेकोले औपचारिक रूपमै पर्यटकीय प्याकेज ल्याउन लागिएको नेपाल पर्यटन बोर्डका वरिष्ठ अधिकृत सुधन सुवेदीले बताए । उनका अनुसार बोर्डले सबै अञ्चलका पर्यटकीय स्थललाई समेटेर प्योकज ल्याउने प्रयास गरेको छ । व्यवसायीलाई पनि संघीयताको संरचना अनुसार नै प्याकेज निर्माण गर्न अनुरोध गरिएको जानकारी सुवेदीले दिए । प्याकेजले सबै पर्यटकीय गन्तब्यलाई समान महत्व दिएर प्याकेजमा समेटिएको बोर्डको भनाइ छ ।
बोर्डले तयार पारेको पहिलो चरणको प्याकेजमा हलेसी महादेव दर्शन टुर, जनकपुरधाम, पाथीभरा मन्दिरको भ्रमण, खप्तड टुर, लुम्बिनी–स्वर्गद्वारी भ्रमणका टुुर, रारा टुर रहेका छन् । यी पर्यटकीय प्याकेज नाट्टा र सोट्टोको सहकार्यमा तयार गरिएका हुन् । ट्रेकिङ, राफ्टिङ, होमस्टे, क्यानोनिङसहितका पर्यटकीय प्याकेज पनि सम्बन्धित संस्थाको सहकार्यमा आउने बोर्डले जानकारी दिएको छ । बोर्डले आफ्नो वेभसाइटमार्फत यस्ता प्योकजको जानकारी दिने र सम्बन्धित संस्थामार्फत प्याकेज खरिद गर्न सकिने बताएको छ ।
पर्यटन बोर्ड र पर्यटन व्यवसायीको सम्युक्त पहलमा नेपालभरका सबै पर्यटकीय गन्तब्यमा भ्रमण प्याकेज तयार पार्दै जाने जानकारी दिइएको छ । घुमफिर वर्षका लागि तयार गरिएका प्याकेज एक दिनदेखिे पर्यटकको रुची अनुसार महिना दिनसम्मका लागि तयार पारीने पनि उल्लेख छ ।
घुमफिर वर्ष २०७३ सञ्चालनमा रहेको र आन्तरिक पर्यटक प्रवद्र्धन गर्न पनि यस्तो प्याकेज आवश्यक भएको नेपाल एशोसिएसन अफ टुर एन्ड ट्राभल एजेन्ट्स (नाट्टा)का अध्यक्ष मधुसुदन आचार्यले जानकारी दिए । उनका अनुसार हाल जुनसुकै गन्तब्यमा विना प्याकेज जाने गरिएकोमा त्यसलाई ट्राभल एजेन्सीमार्फत जाने र पर्यटकीय प्याकेजका रूपमा बिक्री गरिने पनि बताए ।
सबै पर्यटकीय गन्तब्यको भौगोलिक अवस्था, हावापानी, बस्ने, खाने सुविधा र यात्राका क्रममा भैपरी आउने समस्यासहितका जानकारी प्याकेजमा राखिनुपर्ने नाट्टाको भनाइ छ । आन्तरिक पर्यटकका लागि एउटा व्यावसायिक संस्थाले तयार गरेको प्याकेजलाई अर्कोसँग प्रचार गर्ने पनि उल्लेख छ ।